ABŞ prezidenti Donald Tramp bildirib ki, o, Panama kanalına nəzarəti bərpa etmək niyyətindədir və bu işə dövlət katibi Marko Rubio rəhbərlik edir.
“İki sahil” xəbər verir ki, Tramp bu barədə çərşənbə axşamı ABŞ Konqresinin Nümayəndələr Palatası və Senatında ölkədəki vəziyyət, daxili və xarici siyasətin prioritet istiqamətləri ilə bağlı çıxışı zamanı müvafiq bəyanatla çıxış edib.
"Mənim administrasiyam Panama kanalına nəzarəti bərpa edəcək və biz buna artıq başlamışıq. Marko Rubio məsul olacaq. Uğurlar, Marko. İndi bir şey səhv olarsa kimin günahkar olduğunu bilirik", - ABŞ prezidenti vurğulayıb.
Tramp qeyd edib ki, böyük Amerika şirkəti Panama kanalının hər iki tərəfində limanlar əldə etmək niyyətini açıqlayıb: “Panama kanalı amerikalılar tərəfindən başqaları üçün yox, amerikalılar üçün tikilib, amma başqaları ondan istifadə edə bilər”.
Ağ Evin sahibi kanalın Panama hökumətinə təhvil verilməsinə dair razılaşmanın dəfələrlə kobud şəkildə pozulduğu fikrini ifadə edərək davam edib: "Biz bunu Çinə vermədik, Panamaya verdik və biz onu geri alacağıq".
Bundan əvvəl Honq-Konqda yerləşən CK Hutchison Holdings” Panama kanalının hər iki tərəfindəki limanları idarə edən törəmə şirkətinin 90%-lik payını amerikalı investorlara satacağını bildirmişdi. “BlackRock Inc.”, “Global Infrastructure Partners” və “Terminal Investment Limited” şirkətlərinin daxil olduğu investor qrupu həmçinin 23 ölkədə 43 liman və 199 körpüyə sahib olan və fəaliyyət göstərən digər törəmə müəssisələrin 80%-ni alacaq. Aktivlərin dəyəri 22,8 milyard dollardır.
Tramp dəfələrlə sübut təqdim etmədən Çinin kanala nəzarət etdiyini iddia edib və ABŞ-ın kanala nəzarəti bərpa etmək istəyini vurğulayıb. Yanvarın 20-də inaqurasiya nitqində o, Panama kanalını geri almaq niyyətini açıqlayıb.
Məhərrəm Ağalaroğlu, “İki sahil”
