ABŞ prezidenti Donald Tramp Konqresdəki çıxışında cavab rüsumları tətbiq edəcəyini təkrarladıqdan sonra, dollar bir qədər bərpa olunub, lakin sonra eniş tendensiyasını davam etdirib. Valyuta son 3 ayda ən aşağı səviyyədə ticarət olunur.
Marja xəbər verir ki, valyuta bazarlarında qeyri-sabitlik davam edərkən, investorlar Trampın Meksika və Kanadaya tətbiq etdiyi yeni 25 faizlik tariflərin, eləcə də çərşənbə axşamı qüvvəyə mindiyi Çin mallarına 20 faizlik rüsumun qlobal ticarətə təsirini qiymətləndirirlər.
Kanada və Çin eyni gün cavab addımları atıb, Meksika prezidenti Claudia Sheinbaum da cavab verəcəklərini deyib, lakin təfərrüatları açıqlamayıb. O, rəsmi cavabı bazar günü elan edəcəyini bildirib.
ABŞ iqtisadiyyatı ilə bağlı qeyri-müəyyənliklər və artan ticarət gərginliyi bazarlarda dalğalanmalara səbəb olarkən, dollar indeksi 105,1-ə enib (Bakı vaxtı ilə saat 12:40-da 0,6% azalma ilə 105.13 olub)
Avronun qiyməti Çərşənbə günü 1,0688 dollara qədər qalxaraq üç ayın ən yüksək səviyyəsinə çatıb. Avronun bahalaşmasına Almaniyada hökumət qurmağa çalışan tərəflərin 500 milyard avroluq infrastruktur fondu yaratmaq və borclanma qaydalarını yumşaltmaq barədə razılaşmaları səbəb olub.
"Almaniyada borclanma limitinin gözləniləndən daha böyük yumşaldılması olarsa, bu, avronu daha da bahalaşdıra bilər"- "Commonwealth Bank of Australia"dan Carol Kong bildirib.
Funt sterlinq 1,2788 dollara düşüb, Yapon yeni də bir qədər ucuzlaşaraq 149,88-ə geriləyib.
Kanada dolları 0,2 faiz dəyər itirərək 1,4424-ə düşüb, Meksika pesosu isə müəyyən itkiləri geri qaytararaq 20,60-da qərarlaşıb.
Ticarət müharibəsinin iqtisadiyyata təsiri narahatlıq doğurur
"Convera"nın qlobal makrostrateqi Boris Kovaceviç, bazarlarda dolların istiqaməti ilə bağlı qeyri-müəyyənliyin davam etdiyi bir vaxtda, "Ticarət müharibələrindən qaynaqlanan inflyasiya təzyiqləri ABŞ iqtisadiyyatının yumşaq eniş şansını təhdid edir. İnvestorlar uzun müddət ərzində iqtisadi artımın daha çox yavaşlamasından narahatdırlar" deyib.
