Döymə dəri xərçənginə səbəb ola bilər

Danimarka və Finlandiyadan olan beynəlxalq alimlər qrupu döymələrin dəri xərçəngi və limfoma inkişaf riskini artıra biləcəyini müəyyən ediblər.

Adalet.az xəbər verir ki, tədqiqat "BMC Public Health" elmi jurnalında dərc olunub.

Bildirilir ki, döymə mürəkkəbi dəriyə yeridildikdə, onun bir hissəsi immun sisteminin mühüm hissələri olan limfa düyünləri tərəfindən sorulur. Məlum olub ki, bu hissəciklər orqanizm tərəfindən yad maddələr kimi qəbul edilir ki, bu da immunitet sisteminin daim aktivləşməsinə və xroniki iltihaba səbəb ola bilər.

Cənubi Danimarka Universitetinin hematoloqu və professoru Henrik Frederiksen izah edir: "Biz mürəkkəbin limfa düyünlərində yığıldığını görürük və bunun onların funksiyalarını poza biləcəyindən və ya digər sağlamlıq nəticələrinə səbəb ola biləcəyindən şübhələnirik".

Məlumata görə,  döymələri olan insanlarda dəri xərçəngi və limfoma diaqnozu qoyulma ehtimalı daha yüksəkdir. Risk xüsusilə iri döymələri olanlarda daha yüksəkdir. Tədqiqat spesifik mürəkkəb rəngləri ilə xərçəng riski arasında dəqiq bir əlaqə tapmasa da, əvvəlki araşdırmalar bəzi piqmentlərin daha zərərli ola biləcəyini göstərib.