Almaniyanın idman geyimləri nəhəngi "Adidas" çərşənbə günü IV rübdə satışlarının artdığını və gözləntiləri üstələdiyini açıqlayıb. Şirkətin neytral valyuta məzənnələri ilə hesablanmış gəliri IV rübdə 19% artaraq 5,97 milyard avroya (6,34 milyard dollar) yüksəlib.
Valyuta.Az "CNBC"yə istinadən xəbər verir ki, bu göstərici, LSEG analitiklərinin proqnozlaşdırdığı 5,72 milyard avrodan daha yüksək olub.
"Adidas"ın əməliyyat mənfəəti ötən ilin eyni dövründə qeydə alınan 377 milyon avro zərərdən bu ilin IV rübündə 57 milyon avroya yüksəlib.
İlin ümumi satışları 12% artaraq 23,7 milyard avroya çatıb. Bu, proqnozlaşdırılan 23,5 milyard avrodan yüksək olub. 2024-cü ildə şirkətin əməliyyat mənfəəti 1,34 milyard avro təşkil edib ki, bu da əvvəlcədən gözlənilən 1,27 milyard avrodan daha çoxdur.
Bu nəticələr "Adidas"ın oktyabr ayında yenilənmiş proqnozlarını da üstələyib. Şirkət o zaman 10%-lik satış artımı və 1,2 milyard avro əməliyyat mənfəəti gözlədiyini bildirmişdi.
CEO B.Qulden: "Gözlədiyimizdən daha yaxşı nəticə əldə etdik"
Şirkətin baş icraçı direktoru Björn Qulden çərşənbə günü açıqlanan nəticələri belə dəyərləndirib: "Uzunmüddətli perspektivdə istədiyimiz yerə hələ çatmamışıq, amma bu, "Adidas" brendinin gücünü, şirkətimizin potensialını və komandalarımızın möhtəşəm işini təsdiqləyən uğurlu bir il oldu. Hələ üzərində işləməli olduğumuz çox şey var, amma 2024-cü ildə əldə etdiklərimizlə qürur duyuram."
2025-ci il üçün proqnozlar
Şirkət gələn il üçün neytral valyuta məzənnələri ilə hesablanan satışların təkrəqəmli yüksək faizlə artacağını və əməliyyat mənfəətinin 1,7-1,8 milyard avroya yüksələcəyini gözləyir.
Qulden 2025-ci il üçün optimist olduğunu bildirib: "Makroiqtisadi qeyri-müəyyənliklər olsa da, bazarın tələblərinə uyğun məhsullarımız və daha çevik, yerli yanaşmamız sayəsində uğur qazanmağımız üçün heç bir səbəb görmürəm."
Rəhim
