Argentina millisinin hücumçusu Lautaro Martines şərəfini qoruduğu "İnter"in tarixinə düşüb.
Fanat.Az yerli mətbuata istinadən xəbər verir ki, 27 yaşlı hücumçu buna Çempionlar Liqasının 1/8 final mərhələsinin ilk oyununda - Niderlandda "Feyenoord"u məğlub etdikləri matçda (2:0) qol vurmaqla nail olub.
O, "qara-göylər"in heyətində qitənin bir nömrəli klub turnirində ən çox fərqlənən oyunçu ünvanına sahib çıxıb. 18 dəfə rəqib qapılarına yol tapan Martines sabiq "İnter"li Sandro Matsolanı geridə qoyub. Matsola 1961-1977-ci illər aralığında Avropa Çempionlar Kubokunda (hazırkı Çempionlar Liqası) 17 qolla yadda qalıb. Milan təmsilçisinin ÇL-dəki 3-cü bombardiri isə keçmiş braziliyalı forvard Adrianodur - 14 qol.
Nihat
