BAKI,TurkicWorld
ABŞ-dan Hindistana xam neft tədarükü fevral ayında son iki ilin maksimumuna yüksəlib.
TurkicWorld AzerVoice-ə istinadən xəbər verir ki, bu artımın əsas səbəbi, ABŞ-ın sanksiyaları fonunda Rusiyadan gələn neft tədarükünün azalmasıdır.
Məlumata görə, fevral ayında ABŞ-dan Hindistana gündəlik orta hesabla 357 min barrel neft göndərilib ki, bu da ötən ilin eyni dövrü ilə müqayisədə 1,5 dəfə çoxdur.
ABŞ neftinin əsas alıcıları Indian Oil Corp, Reliance Industries və Bharat Petroleum olub. Bu şirkətlər nefti əsasən Equinor, Exxon Mobil və Gunvor ticarət şirkətlərindən alıblar.
Indian Oil şirkətinin maliyyə direktoru Anuj Ceyn yanvar ayında bildirib ki, 2023-cü ilin maliyyə ilinin ilk doqquz ayında şirkət Rusiyadan alınan neftin payını 30%-dən 25%-ə endirib. O, bu tendensiyanın gələcəkdə də davam edəcəyini proqnozlaşdırıb, çünki sanksiyalar Rusiya neftinin tədarükünə təsir göstərməkdə davam edir.
Anuj Ceynin sözlərinə görə, hazırda dünya bazarında neft çatışmazlığı müşahidə olunmur. Lakin Rusiya şirkətləri bazardakı mövqelərini qorumaq üçün daha sərfəli qiymət təklif etməlidirlər. Bununla belə, hansı endirimlərin nəzərdə tutulduğunu açıqlamayıb.
