Finss.az - Avropa Mərkəzi Bankının (ECB) faiz dərəcəsi ilə bağlı ötən gün qəbul etdiyi qərar, avronun dollar və funt sterlinq qarşısında artımını dəstəkləyərək, son bir neçə ayın ən yüksək səviyyələrinə çatmasına səbəb olub.
Beləliklə, EUR/USD cütlüyü ötən ilin noyabr ayında qeydə alınan səviyyəni aşaraq 1.08520-yə qədər yüksəlib.
EUR/GBP valyuta cütlüyü isə, 0.84100 səviyyəsini test etməklə, cari ilin yanvar ayından bəri ən yüksək qiymətini əldə edib. Bu artım, avronun ingilis funtu qarşısında da gücləndiyini göstərir.
Eyni zamanda, dolların "güvənli liman" aləti kimi qəbul olunan İsveçrə frankı qarşısında ucuzlaşmağa davam etdiyi müşahidə olunur. USD/CHF cütlüyü bu gün səhər saatlarında 0.88140 həddinə qədər geriləyib.
Bu dəyişikliklər, Avropa Mərkəzi Bankının faiz qərarının dünya valyuta bazarında önəmli təsirlər yaratdığını və avrozonanın iqtisadi vəziyyətinə dair optimist gözləntilərin artdığını göstərir.
