Ukaynalı kriminal avtoritet Oleq Krapivin ("Oleq Bakinski") və onunla birgə ittiham olunan Konstantin Kuçerin cinayət işi üzrə məhkəmə prosesi keçirilib.
Reyting.az Report-a istinadla xəbər verir ki, Bakı Ağır Cinayətlər Məhkəməsinin hakimi Elnur Nuriyevin sədrliyi ilə video formatda keçirilən prosesdə şahidlər ifadə verib.
Şahid qismində dindirilən Arif Hüseynov bildirib ki, hadisə baş verən şirkətdə hüquqşünas kimi çalışıb və həmin gün otağında olub:
"Direktorun otağından 3-4 nəfərin yüksək səslə danışdığnı eşitdim. Koridora çıxanda direktoru və Füzuli Musayevi gördüm, digərlərini tanımadım. Orada dava-dalaşın olduğunu görməmişəm. Həmçinin dava-dalaşın olması ilə bağlı hər hansı bir izlə də rastlaşmamışam".
O, deyib ki, zərərçəkən şirkətlərlə bağlanan müqavilələrdən də xəbəri olub: "Həmin müqavilələrdə qeyd olunmuşdu ki, şirkət sifarişləri vaxtında çatdıracaq." Günay Bankın bağlandığından da xəbərim var idi. Həmçinin digər tərəfdaş banklarla da yazışmalarım olub".
Prosesdə digər şahid Elşən Soltanov barəsində məcburi gətirilmə qərarı çıxarılıb.
Qeyd edək ki, cinayət işi üzrə Rusiya vətəndaşı Zaxarenkov Valeriy Nikolayeviç, “Aviazapçast” ASC və "Promışlennie Postavki Kazaxstan” MMC zərərçəkmiş qismində tanınıb.
"Oleq Bakinski" DİN Mütəşəkkil Cinayətkarlığa Qarşı Baş İdarəsi tərəfindən Bakıda həbs edilib. Daha sonra barəsində həbs qətimkan tədbiri seçilib.
İttihama görə, təqsirləndirilən Konstantin Kuçer mülki hava gəmilərinin ehtiyat hissələrini Ukraynadan gətirərək Hindistan, Qazaxıstan və digər ölkələrdə sata biləcəyini vəd verməklə zərərçəkən şirkətlərdən külli miqdarda pul vəsaiti alıb. Ələ keçirdiyi vəsaitləri Asiya və Avropadakı bank hesablarına köçürərək şəxsi ehtiyacları üçün istifadə etməkdə təqsirləndirilib.
İttihamda qeyd olunub ki, zərərçəkənlər Konstantin Kuçerlə görüşmək üçün Bakıya gəliblər. Daha sonra Oleq Krapivinlə birgə onun Bakıda yerləşən ofisinə gediblər. Bu zaman onlar arasında mübahisə yaranıb.
Oleq Krapivinə Cinayət Məcəlləsinin 221.3-cü (xuliqanlıq, silah qismində istifadə olunan əşyalardan istifadə etməklə törədildikdə), 127.2.3 (Qəsdən sağlamlığa az zərər vurma), digər təqsirləndirilən Konstantin Kuçerə isə 178.4-cü (dələduzluq - xüsusilə külli miqdarda ziyan vurmaqla törədildikdə), 221.3-cü (xuliqanlıq, silah qismində istifadə olunan əşyalardan istifadə etməklə törədildikdə) maddəsi ilə də ittiham verilib.
