Ölkə kubokunun 1/4 final mərhələsinin cavab oyunları da bu mənada istisna olmadı. “Zirə”nin baş məşqçisi Rəşad Sadıqov “Araz-Naxçıvan”la oyunda qapılarına təyin olunan 2-ci penalti ilə bağlı belə dedi:
“İkinci epizodla bağlı 50-100 nümunə gətirərəm. Bir neçə klubumuzun blokdan istifadə etdiyini bilirik. VAR-a və meydanda olan hakimə belə epizodları göstərə bilərəm. Bu gün bizim xeyrimizə belə epizod olsaydı, deyərdilər ki, futbolçular bir-birini tuturdu və mübarizədi. Belə şeylərə öyrəşmişik. Hakimlər çox vaxt zərərimizə qərarlar qəbul edir. Digər məqamlarda da çoxsaylı dayanmalar oldu. Amma ilk hissəyə cəmi üç dəqiqə əlavə olundu. Hakimliyin üzərində çox dayanmaq istəmirəm”.
“Neftçi”nin baş məşqçisi Samir Abasov da oyunsonrası mətbuat konfransında Bassala Sambunun birbaşa “qırmızı” almasını doğru saymadı:
“Son vaxtlar verilən qərarlar, bizim matçlarda baş verən hadisələr məni narahat etməyə başlayıb. Bu hardan irəli gəlir? Hakimlər üçün də bu gün çox çətin idi, qaça-qaça meydançanı görmək... Amma elə epizodlar var ki, TV-də siz də, köhnə hakimlər də dəfələrlə vurğulayıblar. Bizə referilər seminar keçir. Hər epizod kitabdakı qədər olmur. Həmin vəziyyətə görə hər şeyi təhlil edib ondan sonra qərarlar verilməlidi. Bugünkü qırmızı vərəqəyə etiraz etdim və edirəm də. Top bizim oyunçudadı. Aqressivlik yox, top almaq yox. Ötürmə verir və ayağı rəqibə dəyir. Şiddət də yoxdu. VAR sistemi var. VAR-a baxa-baxa düşünməyə vaxt da olur. Sarı vərəqə də göstərmisən. "Qırmızılıq" bir şey yox idi, etiraz edirəm. Bir az diqqətli olmaq lazımdı. Başqa cür anlaşıla bilər. Bəzi epizodları qarşımıza qoyarlar ki, xeyrinizə qərarlar verilib. Referilərin düşdüyü vəziyyətdə kitaba yox, həmin vəziyyətə görə qərar vermələrini istəyirəm. Qırmızı vərəqə ağır idi”.
“Futbol+”in daimi eksperti Fariz Yusifov bu qərarlarla bağlı belə dedi:
“Hər iki oyundakı epizodları diqqətlə izlədim. Son iki turda baş məşqçilər hakimlərin üzərinə getmək istəyir. Amma baş məşqçilərə əvvəlcə futbolçuları ilə danışmağı tövsiyə edərdim. Komandada oyun qaydalarını bilən mütəxəssis olmasa da, əməkdaş olar. “Zirə”- “Araz-Naxçıvan” oyununda qapı qarşısında müdafiəçinin etdiyi hərəkəti diqqətlə izləmək lazımdı. Rəşad Sadıqovun özü də müdafiəçi olub. Qapı qarşısında futbolçunu qucaqlamaq qaydalar çərçivəsində deyil. Cüzi bir hərəkət olan zaman da müdafiə olunan komandanın xeyrinə qiymətləndiririk. Müdafiəçinin etdiyi epizod VAR-da da incələnir. Top havada olarkən futbolçunu top uğrunda mübarizə aparmasına imkan vermir. Bəlkə də güləşin bir növüdü. Burda necə penalti qərarı ilə razılaşmayaq? “Neftçi” – “Kəpəz” matçında hava şəraiti kəskin idi. Futbolçular hansısa addım atır, amma sonluğunu fikirləşmir. “Neftçi”nin oyunçusu bilərəkdən etmədi. Oyunçunun qorunmayan hissəsinə toxunuş edir. Halbuki həmin toxunuş futbolçuya ağır xəsarət yetirə bilər. Qaydalar bunu incələyir. Ən önəmlisi futbolçunun həyat və sağlamlığıdı. Bəlkə də “Neftçi”nin futbolçusu həmin epizodu izlədikdən sonra dərindən bir ah çəkib. Futbolçular da oyun qaydaları ilə bağlı təlimatlandırılmalıdı. Mövsümün sonuna az qalıb. Hər komandada bu qaydaları bilən bir əməkdaş lazımdı. Fikrimcə, hər iki oyunda hakimlər epizodları düzgün qiymətləndirdi. Komandalarla bir neçə dəfə söhbət aparmaq lazımdı. Hakimlər ilk növbədə öz adlarını qoruyur. VAR-a baxıb qərar vermək üçün çox gözəl şərait yaradılıb. Futbolçularda da müəyyən gərginlik var”.
ƏSƏD SEYİDOV
