Martın 10-da Almaniyada ölkənin ən böyük hava limanlarında genişmiqyaslı tətillər başlayıb və aksiyalar 24 saat davam edəcək.
Bu barədə “European Pravda” DW-yə istinadən xəbər verir. Tətillər Frankfurt-Mayn, Münhen, Ştutqart, Köln/Bonn, Düsseldorf, Dortmund, Hannover, Bremen, Hamburq, Berlin-Brandenburq və Leypsiq-Halle hava limanlarına təsir edib. Frankfurt Hava Limanı əhəmiyyətli fasilələr barədə xəbərdarlıq edib və sərnişinləri “hava limanına çatmazdan əvvəl öz aviaşirkətləri ilə uçuş statusunu yoxlamağa” çağırıb. Kommunal xidmət işçiləri, yerüstü ekipaj və aviasiya təhlükəsizliyi işçiləri əmək haqqı mübahisəsi səbəbindən işdən kənarda qalıblar.
“Verdi” həmkarlar ittifaqı 2,5 milyona yaxın işçi üçün kollektiv əmək haqqı müqaviləsi tələb edir.
Tətillər bazar ertəsi əmək haqqı üzrə danışıqların ikinci raundu uğursuzluqla başa çatdıqdan sonra başlayıb. Federal hökumət və yerli bələdiyyələr “Verdi”nin təkliflərinin, o cümlədən maaşların 8% artırılması, bonusların artırılması və üç əlavə istirahət gününün maliyyə baxımından uyğun olmadığını bildiriblər. Tətil Almaniyanın böyük bir hissəsində hava nəqliyyatını pozmaq məqsədi daşıyır.
//Samir Qurbanov, Editor.az
