“Eghtesad News” saytı yazıb ki, ekspertlərin fikrincə, coğrafi baxımdan Türkiyə, Azərbaycan, Ermənistan və İran arasında yerləşən Araz çayı su böhranı səbəbindən Tehran üçün vacibdir.
Ancaq çayın tərkibindəki Ermənistan tərəfindən atılan zərərli tullantılar İran üçün ciddi problemə çevrilib. Hər damcı suyun kritik problem olduğu Yaxın Şərqdə Araz çayının çirklənməsi yalnız ekoloji fəlakət deyil, həm də geosiyasi məsələdir.
Bildirilib ki, Ermənistan və İrandakı geosiyasi dəyişikliklər fonunda həyati əhəmiyyət kəsb edən su ehtiyatının taleyi ortaq və vacib resursdan strateji manevrlər üçün alətə çevrilib. Arazın çirklənməsi indi çox mübahisəli bir məsələ olub və uzunmüddətli ekoloji problemlər üzərində siyasi qələbələrin prioritetləşdirilməsinin təhlükələrini nümayiş etdirir.
Sitat: “İran, Azərbaycan və Ermənistan ərazisindən keçən Araz çayı 20 milyona yaxın insanı su ehtiyatı ilə təmin edən mənbədir. Ancaq kimyəvi, sənaye, eləcə də radioaktiv tullantıların çaya axıdılması onun kənd təsərrüfatında və içməli su təchizatında istifadəsini təhlükə altına qoyur. Artıq çirklənən yalnız çayın suyu deyil, çöküntülər və bitkilər üzərində aparılan tədqiqatlar zəhərli maddələrin ətraf mühitə də sızdığını təsdiq edib. Sənaye və mədən tullantıları davamlı olaraq çayı zəhərləyir. Bu çirklənmənin əsas hissəsi Ermənistan və İrandan gəlir. Burada fabriklər, kimya zavodları və elektrik stansiyaları çirkli tullantıları birbaşa çaya axıdır...”.
visiontv.az
