ABŞ-nin Pensilvaniya ştatında kiçik təyyarənin qəzaya uğraması nəticəsində göyərtəsində olan 5 nəfərin yaralandığı açıqlanıb.
"Cebheinfo.az" xəbər verir ki, Manheim qəsəbəsindəki qocalar evinin dayanacağında qəzaya uğrayan təyyarədə xəsarət alan 5 nəfər xəstəxanaya aparılıb və ərazidə olan 10-dan çox avtomobilə ziyan dəyib.
Bunu Manheim qəsəbəsinin yanğınsöndürmə rəisi Scott Little mətbuat konfransında bildirib.
Little tək mühərrikli “Beechcraft Bonanza” tipli kiçik təyyarənin havaya qalxdıqdan qısa müddət sonra qəzaya uğradığını və yaralılardan üçünün yanıqlar üçün müalicə olunduğunu, iki nəfərin isə yüngül xəsarətlərlə xəstəxanadan buraxıldığını söyləyib.
Sosial mediada paylaşılan görüntülərdə təyyarədən çıxan alovların bir neçə metr yüksələrək dayanacaqdakı bəzi avtomobillərə sıçradığı görünür.
ABŞ Federal Aviasiya İdarəsi yanvar ayından bəri bir neçə təyyarə qəzasından sonra baş verən qəza ilə bağlı araşdırmalara başlanıldığını açıqlayıb.
