ABŞ prezidenti Donald Tramp Kanadanın Ontario əyalətinin baş naziri Doq Fordun ABŞ-a satılan elektrik enerjisinə 25 faizlik tarif tətbiq edəcəyi barədə qərarına sərt reaksiya verib.
Azreform.info xəbər verir ki, bu barədə “Truth Social” hesabında yazan Tramp Kanadadan ABŞ-a idxal edilən bütün polad və alüminium məhsullarına əlavə 25 faiz gömrük rüsumu əlavə etməklə rüsumun həcmini 50 faizə çatdıracaqlarını açıqlayıb.
Ontarionun ABŞ-a satılan elektrik enerjisi tariflərinin yaratdığı problemə toxunan Trump deyib ki, tezliklə o bölgədə elektrik enerjisi üçün Milli Fövqəladə Vəziyyət elan edəcək. “Bu da ABŞ-a Kanadadan gələn bu pis niyyətli təhlükəni azaltmaq üçün sürətlə hərəkətə keçməyə imkan verəcək", - Tramp vurğulayıb.
O əlavə edib ki, Kanadaya ildə 200 milyard dollardan çox subsidiya verirlər: “Niyə? Bu belə davam edə bilməz. Məntiqli olan yeganə şey Kanadanın 51-ci ştatımız olmasıdır.
Bununla da dünyanın ən böyük və ən güclü dövləti hər zamankından daha böyük və güclü olacaq və Kanada da bunun böyük bir hissəsi olacaq. O zaman Kanada hərbi baxımdan daha təhlükəsiz olacaq və sərhəd probleminin olmayacaq”.
Kanadanı təhdid edən Tramp 2 apreldə ABŞ-a gələn avtomobillərə tətbiq edilən tarifləri əhəmiyyətli dərəcədə artıracağını, həmçinin Kanadada avtomobil istehsalını birdəfəlik dayandıracağını bəyan edib.
Mürtəza
Azreform.info
