252 milyon il əvvəl baş verən kütləvi yox olma hadisəsinin tədqiqi mövcud qlobal istiləşmənin bizi hara aparacağına dair ipucları verir.
QHT.az xəbər verir ki, müasir ekoloji problemlər qlobal ekosistemdə geri dönüşü olmayan dəyişikliklərə və hətta planet miqyasında məhvolmaya səbəb ola bilər. Interesting Engineering jurnalının yazdığına görə, bu cür ssenarilər Yer tarixində artıq baş verib. Təxminən 252 milyon il əvvəl baş verən Perm-Trias sönmə hadisəsi dəniz həyatının 96%-ni, qurudakı onurğalıların isə 70%-ni yox etdi. Buna səbəb atmosferə 100.000 milyard metrik ton karbon qazı buraxan dağıdıcı vulkan püskürmələri idi. Nəticədə qlobal istiləşmə sürətləndi, okeanlar oksigensizləşdi və ekosistemlər çökməyə başladı.
Cenevrə Universitetindən Dr. Maura Brunettinin rəhbərlik etdiyi tədqiqatçılar bu dövrün ekosistemlərini araşdıraraq, qədim temperaturun Selsi üzrə 10 dərəcə artdığını müəyyən ediblər. Onlar fosil qeydlərini və iqlim modellərini müqayisə edərək, soyuq Perm dövründən xaotik erkən Trias iqliminə keçidin ciddi dəyişikliklərə səbəb olduğunu aşkar ediblər.Müasir dövrümüzdə də buzlaqların əriməsi, okean axınlarının zəifləməsi və biomüxtəlifliyin azalması ekosistemlərin sabitliyini təhdid edir. Alimlər xəbərdarlıq edir ki, CO₂ emissiyaları bu sürətlə davam edərsə, 2700 ildən az müddətdə Perm dövrü ilə eyni səviyyəyə çata bilərik. Bu isə növbəti kütləvi məhvin əsasını qoya bilər.
R.İmanov
