Adı qorxu janrının sinonimi olan, əsərləri dəfələrlə filmə çevrilən Stiven Kinqin daha bir romanı yenidən çəkilişə hazırlanır. Netflix Kinqin "Kujo" romanını yenidən filmə çəkmək üçün yaşıl işıq yandırıb.
Hafta.az-ın “Hollywood Reporter”a istinadən yazdığına görə, qorxunc hekayənin bu yeni adaptasiyasını “Companion”, “Strange Darling” və “Late Night with the Devil” kimi qorxu filmləri ilə tanınan Roy Li istehsal edəcək.
Hekayədə itin mehriban heyvandan qaniçən öldürmə maşınına çevrilməsi, avtomobilində sıxışan ana və oğlunun sağ qalmaq uğrunda mübarizəsi diqqət mərkəzindədir.
Netflix artıq layihə üçün ssenarist axtarışına başlayıb.
İlk dəfə 1981-ci ildə nəşr olunan roman 1983-cü ildə Di Uollesin oynadığı filmə uyğunlaşdırılıb. Filmdə 90 kiloqramlıq Saint Bernard cinsi Kujo, dovşanı qovarkən başını soxduğu çuxurda quduz yarasa tərəfindən dişləndikdən sonra ölümcül, amansız və planlı ovçuya çevrilir.
Ana və oğul xarab olan balaca avtomobillərində günəşin altında qalıblar. Onlar ya quduz itlə mübarizə aparmalı, ya da həddindən artıq istidə avtomobildə qalaraq günvurma riski almalıdırlar.
Kinqin 1976-cı ildə nəşr olunan “Carrie” romanı ilə başlayan uyğunlaşma ənənəsi uzun müddət Hollivudun böyük marağına səbəb olub.
77 yaşlı Kinqin romanları dəfələrlə böyük ekrana uyğunlaşdırılıb və uğur qazanıb. Bunlara “The Shining”, “The Shawshank Redemption”, “Stand by Me və It” daxildir.
Mayk Flanaqan Kinqin əsərlərini böyük ekrana uyğunlaşdıran adlardan biridir. Rejissor Kinqlə birlikdə “The Life of Chuck”, “DoctorSleep” və “Gerald's Game” kimi tamaşalarda işləyib.
