Mümkün Rusiya-Ukrayna razılaşmasının Azərbaycan və region ölkələrinə (Mərkəzi Asiya və Cənubi Qafqaz ölkələrinə) təsirlərindən biri Rusiyadan pul köçürmələrinin azalması ilə bağlı olacaq.
“APA-Economics” xəbər verir ki, bu barədə “S&P Global Ratings” beynəlxalq reytinq agentliyindən bildirilib.
Qeyd edilib ki, 2022-ci ildə pul köçürmələrinin və bank köçürmələrinin kəskin artması Özbəkistan, Gürcüstan, Azərbaycan, Qazaxıstan, Ermənistan və Tacikistan üçün cari hesab balansını orta hesabla 6.5 faiz bəndi yaxşılaşdırıb. Azərbaycan və Qazaxıstan üçün bu yaxşılaşma həm də neft qiymətlərinin artması ilə əlaqəli olub. Bununla belə, 2023-cü ildə bankların daha sərt uyğunluq tələbləri və Rusiya vəsaitlərinin digər yurisdiksiyalara yönləndirilməsi səbəbindən bu təsirin əksəriyyəti tərsinə çevrilib.
Reytinq agentliyi hesab edir ki, ticarət axınlarının dəyişməsi isə Rusiyaya qarşı sanksiyaların yumşalmasının vaxtı və dərəcəsindən asılı olacaq: “Rusiya-Ukrayna müharibəsi başladıqdan sonra Avropanın Rusiyaya ixracının əhəmiyyətli bir hissəsi Mərkəzi Asiya və Cənubi Qafqaz vasitəsilə yönləndirilib. Bu ölkələrin cari hesab balansına təsiri isə ümumilikdə neytral olub, çünki yüksək əlavə dəyərli idxal malları yenidən Rusiyaya ixrac edilib. Bununla belə, xüsusən Qazaxıstan üçün 2024-cü ildə bu ticarət axınlarında ciddi azalma baş verib, əsasən daha sərt sanksiyalar və daxili uyğunluq tələbləri səbəbindən. Uzunmüddətli perspektivdə nəqliyyat və logistika, ticarət xidmətləri və yerli istehsala yönəldilən investisiyaların artması, hətta Rusiyaya ticarət axınları azalsa belə, region ölkələri üçün iqtisadi faydalar təmin edəcək”.
