Bir az da yaxşı şeylərdən bəhs edək.
Xüsusən əgər o, futbola aiddirsə.
Xüsusən futbolumuzda müsbət hadisələrdən sarıdan kasadlıqdırsa.
Bəs, o iki hadisə nədir?
Birincisi odur ki, Fernandu Santuş əsas millimizə 20-21 yaşlı 3 gənc oyunçu dəvət edib. Onlar birinci liqadan Şahin Şahniyarov (“Qəbələ”), Premyer Liqadan Xəyal Əliyev (“Sabah”) və Ağadadaş Salyanskidir (“Neftçi”). Bu ay Haiti və Belarusla yoxlama matçlarına dəvət ediliblər. Sırf hazırlıq xarakteri daşıdığından həmin oyunlarda bu üç futbolçunun oynadılması yaxşı olar.
Əks halda dəvət sadəcə, dekorasiyaya bənzəyəcək.
Gənclərə şans verməkdən çəkinməməliyik. Futbolda yox a, hər sahədə. Onlar potensiallarını açmaq üçün zəmin olduqca yetişirlər. Yoxsa sanki qutunun içində bir lazımsız əşyatək illərdir qaralanlıqda qaldıqca necə gün üzünə çıxa bilərlər?
Bir gənc futbolçumuz vardı.
Zaur Tağızadə.
Azərbaycan millisinin heyətində nəhəng Portuqaliyaya qol vuranda 20 yaşı tamam olmuşdu görəsən? 22 yaşına çatanda Slovakiyaya da qol vurmuşdu…
Millimizin liderlərindən idi. Zədələr imkan vermədi potensialını tam açmağa.
Bəxtsiz cavan.
İllərdir Zaur kimi oyunçuları çıraqla axtarırıq, tapa bilmirik. Bəlkə elə Zaur kimi illərdir qutunun içində qalan neçə-neçə istedadımız var? Bəlkə problem odur ki, onları heç yaxşı axtarmırıq, ya bacarmırıq, ya həvəs göstərmirik?!.
Tapanda isə böyüməsinə laqeyd yanaşırıq.
Yaxud bir az uzaq tarixdə Anatoli Banişevski “Neftçi”dən ilk dəfə SSRİ yığmasına çağırılanda, “Lujniki”də Peleyə qarşı oynayanda cəmi 19 yaşının içində idi.
“Marakana”da elə həmin Braziliyaya qol vuranda, dünya çempionatında bürünc medal qazananda 20 yaşında idi.
Yəni az da olsa, Azərbaycan futbolunun talantları olub da.
Yəni həmin talantlar indi də var. Sadəcə, qutunun içindədirlər. Axtarmalıyıq, tapmalıyıq, gün işığına çıxarmalıyıq.
Şəhər-şəhər, kənd-kənd, məhəllə-məhəllə, qapı-qapı…
Və onlar uşaqların arasındadır.
İkinci hadisədir bax elə onlarla bağlıdır.
Bu gün “Sabah” klubu elan etdi ki, U-11, U-12 və U-13 komandalarının üzvləri üçün ingilis dili kursları təşkil edəcək. Bununla bağlı artıq müvafiq təhsil müəssisəsi ilə müqavilə də imzalanıb.
Azərbaycanlı uşaq futbolçuların indidən dil biliyini zənginləşdirməyə başlaması onların gələcək karyerasına, bütövlükdə dünya görüşünə müsbət təsir edə biləcək bir faktdır. Bu yaxınlarda “Sabah” klubunun bazasında kitabxana da yaradılıb.
Yəni mesaj həm də budur ki, oxuyun. Həyat İnstaqramda, “Tik-tok”da yüngül, aşağı səviyyəli paylaşımları izləməkdən ibarət olmamalıdır. Səhv etmirəmsə, bunlar Azərbaycan futbolu üçün bir ilkdir. Odur ki, müsbət nələrsə olanda, onu dilə gətirmək, heç olmasa, səbəbkarlara quru “sağ ol” deməkdən çəkinməməliyik.
“Sabah” klubu akademiyaya isti münasibət ilə seçilir. Ola bilər, müəyyən problemlər onlarda da var. Amma bu, digər bir çox klubun dırnaqarası “akademiyasında” müşahidə olunan xaos, dərəbəylik səviyyəsində deyil.
Heyf ki, bu klubun əsas komandasının nəticələrini onun güclü maliyyə dəstəyinə uyğun hesab etmək olmaz. Gələcəkdə bu problemi aradan qaldırmaqsa həm də yaxşı məşqçi seçimindən keçir.
O məşqçiləri yad diyarlarda axtarmağa isə gərək yoxdur.
Aydın Bağırov
