Amerika Birləşmiş Ştatları immiqrasiya qaydalarının sərtləşdirilməsi çərçivəsində ölkədə 30 gündən çox qalan kanadalı ziyarətçilərin səlahiyyətli orqanlarda qeydiyyatdan keçmələrini və barmaq izlərini təqdim etmələrini məcburi edib.
“İki sahil” xəbər verir ki, bunu yeni qayda aprelin 11-də qüvvəyə minəcək və artıq mövcud olan, lakin kanadalılara davamlı olaraq tətbiq edilməyən qanunun daha sərt icrasını təmin edəcək.
Mövcud qanun 14 və daha yuxarı yaşda olan əcnəbi vətəndaşların ABŞ-da 30 gündən çox qaldıqları təqdirdə səlahiyyətli orqanlarda qeydiyyatdan keçmələrini tələb edir.
Bununla belə, Kanada ilə ABŞ arasındakı 8,891 kilometrlik quru sərhədi vasitəsilə ölkəyə daxil olan kanadalılar üçün təcrübə tez-tez rahatlaşdırılırdı. ABŞ prezidenti Donald Tramp yanvar ayında vəzifəyə başladığı gün imzaladığı sərəncamla bu qaydaların tətbiqini sərtləşdirib.
“Bu qaydalara əməl edilmədikdə, müxtəlif sanksiyalar tətbiq oluna bilər, o cümlədən cərimələr, yüngül cinayətlər üzrə təqib və azadlıqdan məhrumetmə cəzası tətbiq oluna bilər”, - deyə fərmanda qeyd olunub.
Bu addım Tramp vəzifəyə gəldikdən sonra tarixi müttəfiqlər arasında münasibətlərin pisləşməsinin son nümunəsi kimi qiymətləndirilir.
Tramp daha əvvəl Kanadanın ABŞ-ın 51-ci ştatına çevrilməsi ilə bağlı açıqlamalar vermişdi və bu sözlər Kanadada “ilhaq təhlükəsi” kimi qiymətləndirilmişdi.
Yeni qayda ABŞ-ın Rəsmi Qəzetində dərc edildikdən qısa müddət sonra qüvvəyə minib, eyni zamanda ABŞ polad və alüminium məhsullarına 25% əlavə gömrük rüsumu tətbiq edib ki, bu da Kanadaya iqtisadi zərbə kimi qiymətləndirilib. Buna cavab olaraq Kanada hökuməti təxminən 30 milyard dollar dəyərində ABŞ məhsullarına əlavə rüsumlar tətbiq edəcəyini açıqlayıb.
Qeyd edilib ki, qərar qış aylarını ABŞ-ın Florida, Texas və Cənubi Karolina kimi isti ştatlarında keçirən təxminən 900 min kanadalıya təsir edə bilər.
ABŞ Daxili Təhlükəsizlik Departamentinin hesablamalarına görə, yeni ziyarətçilərin qeydiyyatı qaydaları 2,2 milyondan 3,2 milyona qədər insanı əhatə edəcək.
İmmiqrasiya üzrə hüquqşünas Rosanna Berardi, təcrübənin xüsusi olaraq quru sərhədindən girən və ABŞ-da 30 gündən çox qalmağı planlaşdıran Kanada vətəndaşlarını hədəf aldığını söyləyib və əlavə edib: “Turizm və ya al-ver məqsədi ilə qısa müddətli səfərlər edənlər bu təcrübədən təsirlənməyəcək. Lakin ABŞ-da uzunmüddətli iş tapşırıqları olan kanadalı mütəxəssislər indi bu yeni qeydiyyat tələblərinə tabe olacaqlar".
Məhərrəm Ağalaroğlu, “İki sahil”
