"Ermənistan sülhdən danışsa də, fəal şəkildə müharibəyə hazırlaşır. Avropa İttifaqının (Aİ) missiyasının fəaliyyəti, Hindistan, Fransa kimi ölkələrin verdiyi silahlar, öhdəliklərinin yerinə yetirilməməsi, təxribatlar bunun açıq-aydın göstəricisidir".
QAZİLER.AZ Publika.az-a istinadən xəbər verir ki, bunu Türkiyənin Azərbaycandakı keçmiş hərbi attaşesi, general-mayor Yücel Karauz deyib.
O, Ermənistanın Aİ çətiri altında tələ qurmaq fəaliyyətindən danışıb.
"Azərbaycanın İkinci Qarabağ müharibəsində qələbə qazanmasından sonra noyabrın 10-da imzaladığı Üçtərəfli Bəyanatın üstündən 4 ildən çox vaxt keçir. Bu 53 aylıq müddətdə Ermənistan Azərbaycanla bir masa arxasında oturub sülh müqaviləsi imzalamaq əvəzinə, hər cür oyunlara əl ataraq vaxt udmağa çalışıb. Bir tərəfdən Türkiyəyə, Aİ-yə və dünyaya sülh istəyirmiş kimi mesajlar verib, digər tərəfdən isə daim silahlanıb. İkinci Qarabağ müharibəsində tarixində ən böyük məğlubiyyətə uğrayan Ermənistan Azərbaycana qarşı müdafiə silahları ilə deyil, hücum silahları ilə təchiz olunmağa başlayıb. Bir tərəfdən gedib ABŞ və Aİ ilə müqavilələr imzalayıblar ki, oradan pul və silah yardımı göndərilməyə başlayıb. Bunlar azmış kimi, öz imkanları yetərincə olmadığından Aİ missiyasını ölkəyə dəvət edib, onların "çətirləri" altında Azərbaycan qoşunlarının sərhəddəki mövqelərini, hərəkət yerlərini, bəlkə də gələcəkdə həyata keçirməyi planlaşdırdıqları qisas əməliyyatının istiqamətlərini müəyyən etmək üçün tədbirlər həyata keçirib, kəşfiyyatçı və sorğu-sual idarəsi vasitəsilə qrup daxilində döyüş planlarını təzələyiblər. Bütün bunlarla yanaşı, dezinformasiya yolu ilə Azərbaycanı gözü Ermənistan ərazisində olan, müharibə istəyən ölkə kimi qələmə verməyə çalışıblar və bu gün də bunu davam etdirirlər. Ermənistan bir tərəfdən müxtəlif səviyyələrdə verdiyi bəyanatlarla, digər tərəfdən sərhəddəki təxribatlarla Azərbaycanı tələyə salmaq istəyir", - Karauz bildirib.
General-mayor vurğulayıb ki, Azərbaycan və Türkiyə sülh istəyir, lakin Ermənistan yeni müharibəyə başlayarsa, geri dönüşü olmayan yola girəcək və bunun əvəzini çox ağır ödəyəcək:
"Martın 4-nə keçən gecə Naxçıvan istiqamətində Azərbaycan mövqeləri atəşə tutulub, martın 5-də isə İlham Əliyevin və Rəcəb Tayyib Ərdoğanın iştirakı ilə Iğdır-Naxçıvan təbii qaz kəmərinin açılışı olub. Bundan dərhal sonra, martın 6-da Ermənistan Naxçıvan istiqamətində yanğın törədib. Təkcə bu üçgünlük müqayisə kimin müharibə, kimin sülh istədiyini göstərmək üçün kifayətdir. Ermənistanın Azərbaycanla masa arxasında oturmaq əvəzinə şərtlərin yarımçıq qalması ilə bağlı açıqlamaları bu oyunun tərkib hissəsidir. Ermənistan hakimiyyəti hər fürsətdə açıq şəkildə bildirir ki, onlar müharibə və qisas almaq istəyirlər. Müharibə məqsədləri olmasaydı, 53 ay ərzində sərhədlərin müəyyənləşdirilməsi, konstitusiyanın dəyişdirilməsi, Türkiyə və Azərbaycana qarşı iddialardan əl çəkilməsi istiqamətində addımlar atılardı. Digər diqqətçəkən məqam Ermənistanın Azərbaycan və Türkiyə ilə normallaşma prosesini müstəqil məsələ kimi idarə etmək səyləridir. Təbii ki, Ermənistanın etdikləri əbəsdir. Ermənistana məsləhət görürəm ki, Azərbaycan Ordusunun gücünü sınamasın. Həmişə vurğuladığımız kimi, "Dəmir yumruq" başı dəmir yumruq istəyənlər üçün hələ də havadadır! Azərbaycan Prezidenti və Ali Baş Komandan İlham Əliyevin bir əli sülhə, digər əli isə lazım olanda "Dəmir yumruq"u vurmaq üçün qaldırılır. Bunu unutmasınlar! Biz Ermənistanın İkinci Qarabağ müharibəsi hadisələrindən dərs alacağını gözləyirdik. Biz dəfələrlə bildirmişik ki, bu proses uzun çəkəcək və Ermənistan da vaxt üçün oynayacaq. Ermənistan regionda birgə inkişaf etmək əvəzinə burada bir forpost kimi imperialist dövlətlərin məqsədlərinə xidmət etmək üçün bəzi ölkələrdən aldığı silahlarla müharibəyə başlamaq və Azərbaycanı tələyə salmaq istəyir. Ermənistanın xarici işlər naziri Ararat Mirzoyanın Hindistan mətbuatına müsahibəsi, səfərbərlik sistemində edilən dəyişikliklər və alınan silahlar onların müharibəni başlamağa tələsdiklərini göstərir. Biz də "Haydı, meydan!" deyirik. Beləliklə, Ermənistan yenidən müharibəyə başlasa və "Dəmir yumruq"la nələri itirəcəyini bilməlidir".
Yücel Karauz sülh sazişinin mətni üzərində əldə olunan konsensusa müsbət tarixi hadisə kimi səciyyələndirib və Ermənistana əks yola getməməsi barədə dəfələrlə xəbərdarlıq edib.
"Təbii ki, müsbət irəliləyişlər də var. Dünən Azərbaycanın xarici işlər naziri Ceyhun Bayramov jurnalistlərə bildirib ki, sülh sazişinin maddələri ilə bağlı konsensus əldə olunub. Bu, təqdir edilməli bir haldır. Amma son 4 ildə edilənləri müzakirə etməyimizin səbəbi Ermənistana xatırlatmaqdır ki, Türkiyə və Azərbaycan hər şeydən xəbərdardır. İndi konstitusiyaya dəyişiklik etməklə Ermənistan ölkələrimizə qarşı ərazi iddialarından, tamamilə yalan sübutlara əsaslanan soyqırım ittihamlarından əl çəkməlidir. Tamamilə Azərbaycanın xahişi və təşəbbüsü ilə indiki mərhələyə çatan sülh danışıqları müsbət yekunlaşmalı və ədalətli sülh sazişi imzalanmalıdır. Azərbaycan istəsəydi, noyabrın 10-da üçtərəfli bəyanat imzalanmazdı və müharibə davam edərdi, Ermənistan çox böyük itki verərdi. Lakin Azərbaycanın daimi sülh istədiyi bir mühitdə qarşı tərəfin müharibə istəməsi etik deyil. Ermənistana məsləhətim odur ki, bu səhvə yol verməsinlər. Çünki bu səhvi edənlər bunun bədəlini qanla, göz yaşı ilə, torpaq itkisi ilə ödəyəcəklər. Onların əldə etdikləri silah və kəşfiyyat məlumatlarından istifadə etmək imkanı belə olmayacaq. Dəvət etdikləri, onları müharibəyə təhrik edən missiya üzvləri Ermənistanı tək qoyub öz ölkələrinə qaçmaqdan başqa heç nə edə bilməyəcəklər. Türkiyə isə hər zaman olduğu kimi, hər şəraitdə qardaş Azərbaycanın yanındadır. Orduda say və silah önəmlidir, amma ən əsası vətənə, millətə, bayrağa sevgi, bu yolda ölə bilməkdir. Maşına, tanka, topa bağlanaraq müharibədə saxlanılan əsgərlə heç nə edə bilməzsən. Prezident və Ali Baş Komandan İlham Əliyevin rəhbərliyi ilə, xalqın dəstəyi və güclü ordusu ilə Azərbaycan regional güc olduğunu göstərəcək, sülh istəməyənlərə qarşı nə lazımdırsa edəcək", - Yücel Karauz söhbətini yekunlaşdırıb.
