Rusiya Ermənistan-Azərbaycan sərhədlərində gərginlik yarada bilərmi? – AÇIQLAMA

“Rusiya öz qapılarını heç vaxt Ermənistana bağlamayıb. Baş verən gərginliklərin yaranmasına səbəb isə baş nazir Nikol Paşinyanın Qərbyönümlü siyasət aparması və Qarabağ məsələləri ilə əlaqədardır”.

Yenicag.az-a açıqlamasında bu fikirləri təhlükəsizlik məsələləri üzrə ekspert İlham İsmayıl söyləyib.

O, Rusiya XİN-in rəhbəri Sergey Lavrovun Ermənistan-KTMT münasibətləri ilə bağlı səsləndirdiyi fikirlərə toxunub.

Məsələyə münasibət bildirən İ. İsmayıl isə düşünür ki, Rusiya xarici işlər nazirinin sözlərinə görə, Ermənistanın haqsız bir iddiası var ki, 2020-ci il müharibəsində KTMT İrəvana kömək etmədi.
“Lavrov da bunu onunla əsaslandırmaq istəyir ki, delimitasiya və demarkasiya işləri olmadığı üçün Ermənistanın sərhədlərinin dəqiqliyi yoxdur. O deyir ki, İrəvan delimitasiya-demarkasiya işlərini görsün, daha sonra, əgər Ermənistana müdaxilə olarsa, onda KTMT proseslərə qarışa bilər. Bu açıqlama həm də Moskvanın İrəvana qapılarını açıq saxlamasıdır ki, biz KTMT üzvüyük və bir yerdəyik”, – deyə ekspert bildirib.

“İndi sual oluna bilər ki, Rusiya-Ermənistan münasibətləri yaxşılaşsa, Moskva Azərbaycana təzyiq göstərəcəkmi? Onu deyim ki, Azərbaycana ərazi baxımından təzyiq göstərmək artıq qeyri-mümkündür. Çünki Rusiyanın Qarabağdakı silahlı qüvvələri artıq bölgədən çıxıb. Əgər Rusiya Ermənistan-Azərbaycan sərhədlərində gərginlik yaratsa, eləcə də bizimlə iqtisadi əməkdaşlığı aşağı salsa, bu, Rusiyanın özünə ziyandır. Çünki sanksiyalara məruz qalan Rusiyanın Avropaya yeganə çıxışı faktiki olaraq Cənubi Qafqaz – Azərbaycandır. Onun üçün də Rusiya Ermənistana görə Azərbaycanla münasibətlərini korlamayacaq”, – deyə o, əlavə edib.

“Burada müəmmalı məsələ Ermənistanın Rusiya ilə münasibətlərini yaxşılaşdırıb-yaxşılaşdırmayacağıdır. Moskva çalışır ki, münasibətlər yaxşılaşsın, lakin İrəvana istəyir ki, Azərbaycana pislik və təzyiq etməklə münasibətlər düzəlsin. Bu isə Türkiyə faktorunu nəzərə alsaq, indiki şəraitdə Rusiyanın maraqlarına xidmət etmir”, – ekspert fikirlərini tamamlayıb.
Qeyd edək ki, Rusiyanın xarici işlər naziri Sergey Lavrov Rusiyanın hələ də Ermənistanı özünə müttəfiq saydığını deyib.

Rafi Müslümov