Magistraturaya qəbul imtahanlarında suallar çətinləşdirildi: Ballar enəcək? – NARAZILIQ

“Magistratura təhsil səviyyəsinə keçirilən qəbul imtahanının suallarının çətin salınması imtahan iştirakçıları arasında ciddi narazılığa səbəb olub”.

Bu fikirləri Yenicag.az-a açıqlamasında ötən gün magistratura təhsil səviyyəsinə keçirilən qəbul imtahanlarının çətinliyindən yaranan narazılıq haqda danışan təhsil məsələləri üzrə ekspert Kamran Əsədov deyib.

Onun sözlərinə görə, bu, bakalavr təhsil səviyyəsini bitirərək, magistr səviyyəsinə qəbul olmaq istəyənlərin ixtisas seçiminə öz mənfi təsirini göstərəcək.

“Bu il ali təhsil müəssisələrinin magistratura təhsil səviyyəsinə keçirilən qəbul imtahanlarının həm birinci, həm də ikinci cəhdinin suallarını təhlil etsək, test tapşırıqlarının əvvəlki illərlə müqayisədə çətin olduğunu müşahidə edə bilərik. Magistratura təhsil səviyyəsinə keçirilən qəbul imtahanının suallarının çətin salınması imtahan iştirakçıları arasında ciddi narazılığa səbəb olub. Bu da bakalavr təhsil səviyyəsini bitirərək, magistr səviyyəsinə qəbul olmaq istəyənlərin ixtisas seçiminə öz mənfi təsirini göstərəcək. Keçən illə müqayisədə orta bal cari ildən kifayət qədər yüksək idi. Təbii ki bu müəyyən ixtisaslarda balların daha aşağı enməsinə, hətta minumum ballarla magistratura təhsil səviyyəsinə qəbul olmağın mümkünlüyünü qaçılmaz edir”, – deyə o əlavə edib.

Ekspert qeyd edir ki, illər ərzində sualların ağırlıq səviyyəsinin mütamadi olaraq süni şəkildə çətinləşdirilməsi yaxşı hal deyil:

“Hesab edirəm ki, magistratura səviyyəsinin plan yerlərininn tam olaraq dolması üçün bu addım atılıb. Yəni, yüksək bal toplayanların az olması sayəsində, aşağı bal toplayanların magistr səviyyəsinə qəbul olmalarını təmin etmək üçün bu addım atılıb. Əslində, süni şəkildə qəbul imtahanlarının çətinləşdirilib-asanlaşdırılması beynəlxalq təcrübədə qəbul olunmayan bir addımdır. Bu imtahanı keçirən qurumun ciddiyyətini aşağı salır. Fikrimcə, illər ərzində sualların ağırlıq səviyyəsini mütamadi olaraq süni şəkildə çətinləşdirilməsi yaxşı hal deyil. Bu insanların Azərbaycanda keçirilən imtahanlara inamını və imtahanlara olan etibarlılığını aşağı salır.

Mütəxəssis əlavə edib ki, bu gün Azərbaycanda magistratura təhsil səviyyəsinə imtahan verən şəxslər az bal topladıqlarına görə öz təhsillərini xarici ölkələrdə davam etdirməyə çalışacaqlar:

“Bu da ölkəmizdən kənara beyin, maliyyə axınının olması deməkdir. Xüsusilə məntiq fənnindən təqdim edilən test tapşırıqlarının ağırlıq səviyyəsi çox, sualların həcmi geniş idi.

Tələbələr həqiqətən bu sualları cavablandırmaqda xeyli vaxt ititriblər. Sualların süni şəkildə çətinləşdirilməsi ümumi qəbul olanlara da öz təsirini göstərəcək. Bu da ali təhsil müəssisələrinə daha aşağı ballarla qəbulların həyata keçməsinə, həmçinin plan yerlərinin boş qalmasına gətirib çıxaracaq”.

İsmayıl Bakuvi