Kaliforniya Universitetində Fələstin tərəfdarı etiraz aksiyasında 132 nəfər həbs edilib

UCLA şəhərciyində düşərgə quran Fələstin tərəfdarı etirazçılara qarşı keçirilən əməliyyatlar zamanı ən azı 132 nəfər həbs edilib.

"Operativ Media" xəbər verir ki, bu barədə CNN polis nümayəndələrinə istinadən məlumat yayıb.

Etiraz düşərgəsinin ləğvi əməliyyatında 250-yə yaxın polis əməkdaşı iştirak edib. Nümayişçilər onlara su butulkaları atıblar. Əməliyyat nəticəsində xəsarət alanların olmadığı bildirilir.

CNN-in məlumatına görə, son iki həftə ərzində ABŞ-nin təhsil müəssisələrində Fələstin tərəfdarı etirazlarda iştirak edən 1500-dən çox insan həbs edilib. Aprelin 18-dən etibarən nümayişlər zamanı mərasimləri ləğv edən, tələbələri distant təhsilə keçirən və kampuslara girişi məhdudlaşdıran 30 kollec və universitetdə həbslər olub. Etirazçılar Qəzza zolağında hərbi əməliyyat keçirən İsrailə maliyyə yardımı və silah tədarükünün dayandırılmasını tələb edirlər.