Qırğızıstan-Tacikistan sərhədində atışma baş verdi

Qırğızıstan və Tacikistan sərhədində Tacikistan sakinləri ilə qırğız sərhədçiləri arasında atışma baş verib.
Yeniavaz.com xəbər verir ki, bu barədə Qırğızıstan Milli Təhlükəsizlik Dövlət Komitəsinin Sərhəd Xidməti məlumat yayıb.
“2024-cü il mayın 7-də Qırğızıstan-Tacikistan dövlət sərhədində odlu silahdan istifadə ilə insident baş verib. Təxminən saat 12:20-də (Bakı vaxtı ilə saat 10:20-də) Batken vilayətinin (Qırğızıstan) Leylek rayonunun Ak-Bosoqo kəndi yaxınlığında Qırğızıstanın sərhəd naryadı dövlət sərhəd xəttindən 250-300 metr məsafədə Qırğızıstan ərazisində mal-qara otaran Tacikistan vətəndaşlarını - çobanları müşahidə edib”, - məlumatda qeyd edilib.   
Məlumata görə, sərhədçilər vətəndaşlara ərazini tərk etmək bardədə xəbərdarlıq edib. Tacikistan vətəndaşları sərhədçilərin tələblərinə məhəl qoymayıb, üstəlik, hərbçilərə daş atmağa başlayıblar.
“Çobanlardan biri Qırğızıstan sərhədçisinə tərəf 2-3 dəfə atəş açıb. Vəziyyətin gərginləşməsinin qarşısını almaq üçün qırğız sərhədçiləri havaya xəbərdarlıq atəşi açıblar. Bundan sonra çobanlar Qırğızıstan ərazisindən Tacikistan ərazisinə qaçıblar”, - sərhəd xidməti qeyd edib.
İlkin məlumata görə, insident zamanı Tacikistan vətəndaşlarından biri naməlum şəraitdə ayağından yaralanıb. Qırğızıstan sərhədçiləri arasında isə xəsarət alan olmayıb.
“Hazırda Qırğızıstan-Tacikistan sərhədində sabitlik hökm sürür”, - sərhəd xidmətindən bildirilib.