2020-ci il atəşkəs bəyanatında nəzərdə tutulduğu kimi, Zəngəzur ərazisindən birgə avtomobil və dəmir yolu çəkilə bilər.
Tezadlar.az bildirir ki, bunu Azərbaycan Prezidentinin xüsusi tapşırıqlar üzrə nümayəndəsi Elçin Əmirbəyov Almaniyanın “ZEIT” qəzetinə açıqlamasında deyib. O qeyd edib ki, bu dəhliz vasitəsilə Ermənistan təcrid vəziyyətindən çıxa bilər, tranzit haqlarını toplaya və Türkiyə ilə münasibətlərini yaxşılaşdıra bilər. Ermənistanın bu təklifi rədd etmə ehtimalına gəldikdə E.Əmirbəyov qeyd edib ki, İran vasitəsilə də avtomobil və dəmir yolu çəkilə bilər ki, bu, Zəngəzur dəhlizindən cəmi on kilometr uzun olar. E.Əmirbəyov ermənilərin narahatlığını absurd hesab edib. Qəzetin yayımladığı materialda o da yazılır ki, Ermənistan ərazisinə düşən torpaq zolağının uzunluğu cəmi 34 kilometrdir və Azərbaycanı öz eksklavı olan Naxçıvandan ayırır. E.Əmirbəyov bunun üçün müharibə ehtimalı ilə bağlı suala cavabında bunun qətiyyən olmayacağını vurğulayıb. Onun sözlərinə görə, ölkələr arasında hərbçilərin mübadiləsi də müsbət tendensiyadır və bu, həm də Bakı ilə İrəvan arasında etimadın möhkəmlənməsinə xidmət edir.
Təbii ki, Ermənistanda artıq gec də olsa başa düşürlər ki, Azərbaycanla münaqişə bu ölkəni təcrid vəziyyətə salmaqdadır. Çıxış yolu və Ermənistanın düşdüyü bataqlıqdan xilası isə Azərbaycanla, eləcə də Türkiyə ilə mehriban münasibətlərdən asılıdır. Paşinyanın son günlərdəki bəyanatları da bunun təsdiqi kimidir...
A.Məmmədli
