Basketbol: “Xəzri” yarımfinal seriyasında üstünlüyü ələ keçirdi

Bu gün – mayın 8-də “Sərhədçi” İdman Mərkəzində Azərbaycan Basketbol Liqasının (ABL) növbəti yarımfinal oyunu baş tutub.

Arena.az xəbər verir ki, pley-offun növbəti görüşündə “NTD-İndiqo” və “Xəzri” komandaları üz-üzə gəliblər.

Bu komandalar arasındakı seriyanın 1-ci oyununda sevinən tərəf “Xəzr”i olub. Oyunun əvvələrindən bərabər şəkildə davam edən mübarizə yekunda “Xəzri”nin 63:61 hesablı qələbəsi ilə bitib. Bu qələbə ilə “Xəzri” seriyanın ümumi hesabında 1:0 önə keçib.

Qalib komandanın ən məhsuldar basketbolçusu Cordan Perkins olub – 15 xal, 10 assist. “NTD-İndiqo”da isə Qeylen Smit fərqlənib – 20 xal, 12 ribaund.

Qeyd edək ki, “NTD-İndiqo” ilə “Xəzri” komandaları arasında yarımfinal seriyasının 2-ci oyunu mayın 11-də baş tutacaq.

Ötən gün “Sabah” da “Xırdalan”a 101:85 hesabıyla qalib gəlib və ümumi seriyada 1:0 önə keçib. Bu komandalar arasındakı 2-ci oyun mayın 10-da baş tutacaq.

Hər iki cütdə iki matçın yekununda bərabərlik olarsa, həlledici – üçüncü oyun keçiriləcək.