Gürcüstan parlamentinin Hüquq Məsələləri Komitəsi “Xarici təsirin şəffaflığı haqqında” qanun layihəsini üçüncü oxunuşda dəstəkləyib.
Modern.az BBC-yə istinadən xəbər verir ki, bu proses təxminən bir dəqiqə çəkib.
"Sualınız, şərhiniz, rəyiniz varmı?", - deyə komitənin sədri Anri Oxanaşvili soruşub və özü cavab verib: “Heç bir sual, şərh və ya rəy yoxdur”.
Müxalifətçi deputat Xatiya Dekanoidzenin sözlərinə görə, müxalifət iclasda iştirak edə bilməyib: “Görüş bir dəqiqə yeddi saniyəyə başladı və bitdi. Bu, ağlasığmaz, biabırçı, qeyri-qanuni, hətta əksəriyyət nümayəndələrinin belə iştirak edə bilmədiyi bir toplantı idi. Sadəcə komitə sədri Oxanaşvili və bir neçə nəfər guya legitimlik üçün daxil olub. Bu qeyri-legitim görüşdür”.
Polis nümayişçilərə parlamentin çıxışlarına yaxınlaşmağa imkan verməyib və binanın çıxışlarına bitişik küçələri bağlayıb.