Gürcüstanın paytaxtı Tbilisidə yerləşən “BEEZ” Uşaq Teatrı Mirzə Fətəli Axundov adına Azərbaycan Mədəniyyəti Muzeyində “Tıq-Tıq xanım” adlı yeni tamaşasının premyerasını keçirib.
“Report”un yerli bürosu xəbər verir ki, tamaşanın məqsədi uşaqların asudə vaxtlarını səmərəli keçirmələrinə dəstək olmaqdır.
“Tıq-Tıq Xanım” hekayəsi müasir formatda hazırlanıb, həmçinin Gürcüstanın mədəniyyətini təmsil edən elementlərə də yer verilib.
Tamaşa müasir və xalq musiqilərinin sintezi, eləcə də rəqslərdən ibarət olaraq qurulub, bu da əsərə maraqlı və fərqli yanaşma gətirib.
“Tıq-Tıq Xanım” tamaşasında səsləndirilən milli musiqilərimiz, soydaşlarımız olan körpə fidanların milli ruhda böyümələri üçün əvəzsiz vasitədir. Tamaşada Kaxetidən gələn gürcü qonaqların iştirakı isə xalqlar arasında dostluğun və qarşılıqlı anlaşmanın təbliği baxımından böyük əhəmiyyət kəsb edir.
Tamaşanın ilk premyerası Qardabanidə yerləşən “BEEZ” Uşaq Teatrında planlaşdırılsa da, səhnənin kiçik olması səbəbindən Mirzə Fətəli Axundov adına Azərbaycan Mədəniyyəti Muzeyində keçirilib.
Tamaşanın azyaşlı aktyorları arasında Rəhimə Əliyeva, Səma Ləzgiyeva, Nuri Qurbanov, Seymur Muradov, İslam Akif, Nuray Əhmədova, Rabia Əhmədova, Zəhra Akif, Əzəm Əfəndiyeva, Milana Əliyeva, Məryəm Əliyeva, Gövhər Nəsibova və Əli Bayramov yer alıblar.
Tamaşanın rejissoru Binəli İslamoğlu, rəssamı AzMus, geyim üzrə rəssamı isə Mahnur Ənvərdir.
