Ukrayna Prezidenti Volodimir Zelenski Ukrayna Təhlükəsizlik Xidmətinin (UTX) Donbasda və Maydan hadisələri zamanı qətllərdə əli olan şəxsi zərərsizləşdirdiyini açıqlayıb.
"Far.Az" xəbər verir ki, bu barədə dövlət başçısı britaniyalı jurnalist Pirs Morqana müsahibəsində danışıb.
Söhbət zamanı jurnalist ondan Moskvada "Donetsk Xalq Respublikası"nın (DXR) Boks Federasiyasının prezidenti və "ArBat" ("Erməni Batalyonu") batalyonunun qurucusu Armen Sarkisyanın öldüyü son partlayış barədə soruşub. Cavabında Ukrayna lideri qeyd edib ki, qurum ukraynalıların qətlində ittiham olunan şəxsin zərərsizləşdirilməsi üzrə müvafiq əməliyyat keçirib.
Zelenski vurğulayıb ki, bu şəxsi tanımır və adını bilmir. "Bu hadisənin həmin hal olub-olmadığını demək çətindir", – Ukrayna Prezidenti söyləyib.
Xatırladaq ki, fevralın 3-də Moskvanın elit "Alıye Parusa" yaşayış kompleksində partlayış baş verib, Sarkisyan xəsarətlərlə xəstəxanaya çatdırılıb və sonra reanimasiyada keçinib. Sarkisyan 2014-cü ildən Ukrayna iqtidarı tərəfindən axtarışda olub, 2024-cü ilin dekabrında ona Ukraynanın suverenliyi və ərazi bütövlüyünə qəsd etməkdə yeni ittihamlar irəli sürülüb.
"İzvestiya" qəzeti xəbər verib ki, partlayıcı qurğunu əvvəllər məhkum olunmuş Ermənistan vətəndaşı olan kamikadze işə salıb.
