ABŞ Prezidenti Donald Tramp Qəzza zolağının yenidən qurulması ilə bağlı planlarını bir daha vurğulayıb.
O, müharibədən dağılmış bu ərazini "böyük daşınmaz əmlak layihəsi" kimi gördüyünü bildirib:
“Düşünürəm ki, fələstinlilərin və ya Qəzzada yaşayan insanların ora geri qayıtmasına icazə vermək böyük səhvdir. Biz HƏMAS-ın yenidən orada olmasını istəmirik. Bu əraziyə böyük bir daşınmaz əmlak kimi baxın. ABŞ onun sahibi olacaq və biz orada tələsmədən, yavaş-yavaş inkişaf işləri aparacağıq. Yaxın Şərqdə sabitliyi təmin edəcəyik”.
"Cebheinfo.az" xəbər verir ki, Tramp bunu bazar günü jurnalistlərə bildirib.
BMT-nin məlumatına görə, İsrailin HƏMAS-la müharibəsi nəticəsində Qəzzanın 90%-ə yaxın əhalisi məcburi köçkün vəziyyətinə düşüb və dəfələrlə yer dəyişmək məcburiyyətində qalıb.
Tramp daşınmaz əmlak sahəsində böyük təcrübəsi olduğunu vurğulayaraq, Qəzzanı "tamamilə dağıdılmış bir yer" adlandırıb. Onun sözlərinə görə, bu ərazi sıfırdan qurulacaq və yenilənəcək. O, həmçinin bildirib ki, Yaxın Şərqdəki digər ölkələr Qəzzadan köçkün düşən fələstinliləri "gözəl yerlərdə" yerləşdirə bilər.
İsrailin Baş naziri Benyamin Netanyahu isə Trampın bu fikirlərini “inqilabi və yaradıcı bir baxış” adlandırıb.
Regional liderlər ABŞ Prezidenti Donald Trampın Qəzza ilə bağlı irəli sürdüyü planı qəti şəkildə rədd ediblər. Onlar bildiriblər ki, bu təklif ABŞ-nin onilliklər boyu yürütdüyü xarici siyasətlə ziddiyyət təşkil edir.
Gözlənildiyi kimi, Trampın planı bu həftə Ağ Evdə İordaniya kralı ilə görüşü zamanı əsas müzakirə mövzularından biri olacaq.
Bununla belə, fevralın 9-da Trampın milli təhlükəsizlik üzrə müşaviri Mayk Uolts bildirib ki, prezidentin təklifləri regiondakı digər tərəfləri danışıqlar masasına gətirmək üçün atılmış ilk addımdır.
“Əgər bu plan sizin xoşunuza gəlmirsə, onda danışıqlar masasına əyləşin və öz təklifinizi irəli sürün”, – deyə Uolts NBC kanalında yayımlanan "Meet the Press" proqramında çıxışı zamanı bildirib.
