Paşinyan və onun komandası "dəmir yumruq"dan sonra hələ də ağıllanmayıb
Ermənistan baş nazirinin 10 fevral 2025-ci il tarixində “Armenpress”də dərc olunmuş məqaləsində Azərbaycanın Ermənistana qarşı hücuma hazırlaşdığı və Qərbi Azərbaycan İcmasının məqsədləri ilə bağlı iddiaları, eləcə də bir çox digər əsassız fikirləri reallığı təhrif etmək və dünya ictimaiyyətini yanıltmaq məqsədi daşıyır.
Bu barədə Xarici İşlər Nazirliyinin mətbuat katibi Ayxan Hacızadə Ermənistanın Baş naziri Nikol Paşinyanın “Armenpress” məqaləsində iddiaları ilə bağlı şərhində deyib.
"Maraqlıdır ki, hərbi potensiala sahib olmaq hüququnu müdafiə edən baş nazir 30 illik hərbi işğaldan əlavə, Üçtərəfli Bəyanata əsasən üzərinə götürdüyü öhdəliklərə baxmayaraq, 44 günlük müharibə bitdikdən sonra üç il ərzində Azərbaycan ərazisində ağır silahlarla təchiz edilmiş on mindən çox hazırlıqlı silahlı birləşməni saxlayan ölkəni təmsil edir.
44 günlük müharibə başa çatdıqdan sonra Ermənistanın hərbi xərcləri təqribən üç dəfə artaraq 2021-ci ildə təxminən 600 milyon dollardan 2024-cü ildə 1,6 milyard dollara çatıb. Üstəlik, bu yaxınlarda imzalanmış hərbi müqavilələrə əsasən, Ermənistan əsasən Azərbaycanın ərazilərinə uzaq məsafəli zərbələr endirə biləcək hücum silahları əldə etməkdədir.
Ermənistan Konstitusiyasında və hüquqi aktlarında davam edən ərazi iddialarını, həmçinin revanşizmin artması faktını nəzərə alaraq, Ermənistanın hərbi potensialının artırılmasının əsaslandırılması qeyri-səmimidir və Azərbaycanın təhlükəsizliyinə birbaşa təhdiddir.
Bundan əlavə, Ümumdünya İnsan Hüquqları Bəyannaməsi, Mülki və Siyasi Hüquqlar haqqında Beynəlxalq Pakt, Qaçqınların Statusu haqqında Konvensiya və digər mühüm beynəlxalq aktlarda təsbit edilmiş qayıdış hüququna əsaslanaraq əsas məqsədləri qovulduqları torpaqlara təhlükəsiz və ləyaqətlə qayıdış olan Qərbi Azərbaycan İcmasının fəaliyyəti və məqsədləri haqqında Ermənistanın iddiaları tamamilə əsassızdır. Ermənistan baş nazirinin müxtəlif bəhanələrlə, o cümlədən İcmanın bəyan edilmiş məqsədlərinin yanlış təfsir edilməsi ilə bu hüququ danması, bir daha bu ölkənin siyasətinin bir vaxtlar azərbaycanlıların ölkə əhalisinin əsas hissəsini təşkil etdiyi Ermənistanda hazırda azərbaycanlıların olmamasına gətirib çıxaran qəddarlığının səviyyəsini nümayiş etdirir.
Təəssüf ki, Ermənistan baş nazirinin 2022-ci il Praqa görüşünə, 1991-ci il Almatı Bəyannaməsinə, sülh sazişi layihəsinin Ermənistanın həqiqətən Azərbaycana qarşı heç bir iddiasının olmadığını və olmayacağını təsbit etmək üçün nəzərdə tutulan bəndlərinə istinadlar məhz cənab Paşinyan tərəfindən bir neçə ay sonra, 2023-cü ilin sentyabrında Azərbaycan ərazilərindəki qondarma rejimin “müstəqilliyi” ilə bağlı təbrik mesajı göndərilən zaman, habelə Ermənistanın Konstitusiyasında yer alan ərazi iddialarına və Almatı Bəyannaməsinə qoşulan zaman edilmiş qeyd-şərtlərə göz yumması nəticəsində heçə endirilib.
Hətta bu gün də müharibə cinayətlərində ittiham olunan şəxslərin məhkəmə prosesini alqışlamaq əvəzinə, bu məhkəməni “səhnələşdirilmiş” adlandıran Ermənistan onilliklər ərzində səbəb olduğu yaraları sağaltmaqda və bu prosesin üzə çıxara biləcəyi həqiqətlə üzləşməkdə maraqlı deyil.
Üstəlik, Ermənistan öhdəliklərinin yerinə yetirilməsi, o cümlədən Azərbaycan ilə Naxçıvan Muxtar Respublikası arasında kommunikasiyaların açılması sahəsində əməli addımlar atmaq əvəzinə, diqqəti bu prosesdən yayındırır. Bu istiqamətdə, praktiki addımlarla irəliləmək əvəzinə, Ermənistanın mahiyyətcə əhəmiyyəti olmayan təkliflər irəli sürməsi anlaşılmazlıqlara gətirib çıxarır və reallıqları təhrif edir.
Baş nazirin canfəşanlıqla irəli sürdüyü silahlara nəzarət mexanizmlərinin yaradılmasına gəldikdə isə, 30 ildən artıq müddətdə Ermənistanın özünün iştirak etdiyi silahlara nəzarət mexanizmlərini kobud şəkildə pozduğu və deqradasiya etdiyi, hərbi texnika və silahlarının böyük hissəsini beynəlxalq silahlara nəzarət mexanizmlərindən gizlətdiyi, onları bizim ərazilərimizdə qanunsuz yerləşdirdiyi yaxşı məlumdur. Beynəlxalq müqavilələrə bu cür yanaşma Ermənistanın mövqeyinin qeyri-səmimiliyi barədə nəticə çıxarmağa imkan verir.
Biz qətiyyətlə Ermənistanı sülhə nail olmaq perspektivlərini sarsıdan bəyanat və hərəkətlərdən imtina etməyə çağırırıq".
Türkiyənin Azərbaycandakı keçmiş hərbi attaşesi, ehtiyatda olan general-mayor Yücel Karauz "Sherg.az"a deyib ki, Ermənistan ordusu 44 günlük Vətən müharibəsindən sonra çox ağır məğlubiyyətə uğradı və hərbi texnikasının 60 fazini itirdi:
"Nikol Paşinyan Üçtərəfli Bəyanatdan sonra məsələni sülh və danışıqlar yolu ilə həll etmək varkən, vaxt qazanmaq üçün müxtəlif addımlar ataraq bu günə kimi uzatdı. Ermənistan yalanlarla, məkrli siyasətlə atəşkəs danışıqlarının sülhə çevrilməsini əngəlləyir. Qazandığı zamanı isə silahlı qüvvələrini yenidən qurmaq üçün sərf edir. Özəlliklə əvvəl Rusiya və başqa ölkələrdən almış olduğu köhnələn hərbi texnikanı müasirləri ilə əvəz etməyə çalışır. Başda Fransa və Hindistan, o cümlədən Cənubi Koreya olmaqla müxtəlif ölkələr Ermənistanın silah ehtiyacını təmin edir. Bir ölkənin hərbi texnikanı və ordunu yenidən qurmaq istəməsinin iki mənası ola bilər; Birincisi, özünümüdafiə, ikincisi, yeni müharibəyə hazırlıq. 2 milyonluq əhalisi olan kiçik bir ölkə təbii ki özünü qorumaq üçün silahlana bilər. Lakin texnikaya baxdığımız zaman bunlar 300-500 metrlik hərbi avadanlıqlar olmadığını görürük. Əksinə daha ciddi və əsasən, hava silahları, helikopterlər və s.-dir. Digər tərəfdən getdikcə artan dəstəyin və texnikanın Ermənistan büdcəsi ilə qarşılanması mümkün deyil. Bütün bunlar rəsmi İrəvanın qətiyyən sülh istəmədiyini, revanş duyğular bəslədiklərini və qisas almaq niyyətlərini sübut edir".
Ekspert əlavə edib ki, Paşinyan və onun komandası "dəmir yumruq"dan sonra hələ də ağıllanmayıb:
"Bu mənada münaqişəni beynəlxalq səviyyəyə aparmaq, ABŞ və Avropa Birliyinin siyasi, hərbi dəstəyini əldə etmək istəyir. Hətta Paşinyan fürsət taparsa, məsələni NATO-ya qədər genişləndirər. Ümumiyyətlə Qərbin məqsədi yalnız Ermənistanı Azərbaycanla müharibəyə təşviq etmək deyil. Onlar Rusiyanı Cənubi Qafqazdan sıxışdırıb çıxarmağa, İranı isə Şimaldan dairəyə alaraq bölgəni qanlı müharibə ocağına çevirmək istəyirlər. Eyni zamanda erməni əsilli Türkiyə deputatı Garo Paylanın son çıxışında Ermənistanın Azərbaycana cavab verə bilməsi üçün 3-5 il arasında bir müddətə ehtiyacı olduğunu söylədi. Bu isə onu sübut edir ki, Ermənistan yenidən müharibəyə hazırlaşır".
