Bu gün Azərbaycan Televiziyasının (AzTV) fəaliyyətə başlamasının 69 ili tamam olur.
Bakıvaxtı.az xatırladır ki, ölkənin ilk televiziya kanalı olan AzTV 14 fevral 1956-cı ildə yayıma başlayaraq Azərbaycan informasiya məkanında mühüm rol oynamağa başlayıb.
Televiziyanın ilk yayımları məhdud imkanlarla həyata keçirilsə də, qısa müddətdə inkişaf edərək geniş tamaşaçı auditoriyasına xitab edib. İlk illərdə, əsasən, informasiya, mədəniyyət və incəsənət proqramlarına üstünlük verilib. 1960-cı illərdən etibarən isə AzTV-nin texniki bazası təkmilləşdirilib və rəngli yayıma keçid üçün ilkin addımlar atılıb.
Azərbaycanın müstəqillik qazanmasından sonra televiziya öz məzmununu daha da zənginləşdirib. Dövlət siyasətinin və milli-mədəni irsin təbliğində, eləcə də, ictimai-siyasi proseslərin işıqlandırılmasında AzTV əsas platformalardan birinə çevrilib. Hazırda kanal müasir texnologiyalarla fəaliyyət göstərərək tamaşaçılarına xəbərlər, analitik verilişlər, sənədli filmlər və mədəni proqramlar təqdim edir.
Ölkənin televiziya tarixində mühüm yer tutan Azərbaycan Televiziyası 69 il ərzində media məkanında özünəməxsus mövqeyini qoruyub saxlamış, cəmiyyətin informasiya tələbatını ödəyən əsas qurumlardan biri olmuşdur.
Bakıvaxtı.az olaraq biz də ölkənin birinci kanalında fəaliyyət göstərən həmkarlarımızı təbrik edir, onlara yeni yaradıcılıq uğurları arzulayırıq!
Əli Hüseynov
