Bakı, 21 fevral, AZƏRTAC
Bir sıra ölkənin liderləri və Avropa siyasətçiləri təhlükəsizlik zəmanətləri barədə müzakirə aparmaq və Vladimir Zelenskiyə dəstək olmaq üçün fevralın 24-də Kiyevə səfər edəcəklər.
AZƏRTAC xəbər verir ki, “Politico” nəşrinin məlumatına görə, İspaniyanın Baş naziri Pedro Sançes, həmçinin Avropa İttifaqı Şurasının sədri Antonio Koşta və Avropa Komissiyasının sədri Ursula fon der Lyayen səfər planlarını artıq açıqlayıblar. Eyni zamanda, Latviya, Litva, Malta və Kanada liderləri ya şəxsən, ya da videobağlantı ilə tədbirə qoşulacaqlar. Avropa Parlamentinin sədri Roberta Metsola da müzakirədə iştirak etməyi planlaşdırır.
Nəşrin məlumatına görə, Xorvatiya, Danimarka, Norveç, Finlandiya, Polşa, Estoniya, İsveç, Belçika, İrlandiya, Niderland və Almaniya isə öz siyasətçilərinin görüşdə mümkün iştirakı ilə bağlı sorğuya cavab verməyiblər. Çexiya lideri isə görüşdə iştirak etməyəcək.
