EN

Azərbaycanın Afrikaya və Asiyaya doğru əlaqələrini genişləndirməsi dönməz xarakter alıb ŞƏRH

Bakı, 28 fevral, AZƏRTAC

Son iki həftə ərzində Somalinin, Qvineya-Bisaunun prezidentlərinin və Pakistanın Baş nazirinin Azərbaycana səfərləri, keçirilən yüksək səviyyəli görüşlər və imzalanan sənədlər Prezident İlham Əliyevin həyata keçirdiyi xarici siyasətin nə qədər geniş vizyona və coğrafiyaya malik olduğunu, Afrika və Asiyaya doğru əlaqələrin genişləndirilməsinin dönməz xarakter aldığını bir daha təsdiq edir. Bu baxımdan 5,1 trilyon ABŞ dolları ÜDM-i, 1,28 milyard əhalisi və 7,62 milyon kvadrat kilometr ərazisi olan D-8 təşkilatına Azərbaycanın rəsmən üzv qəbul edilməsi xüsusi əhəmiyyət kəsb edir. Şübhəsiz ki, bu üzvlük ölkəmizin iqtisadiyyatı və xarici siyasətində yeni imkanlar yaradacaq, ticarət əlaqələrini genişləndirəcək, ənənəvi tərəfdaşlardan kənarda yeni bazarlara çıxışı təmin edəcək və dövlətimizin beynəlxalq təsirini daha da artıracaq. Bu mərhələdə təşkilatın əsas aparıcı ölkəsi olan qardaş Türkiyənin rolunu və Azərbaycana verdiyi dəstəyi xüsusi olaraq vurğulamaq lazımdır.

Bu sözləri AZƏRTAC-a açıqlamasında Milli Məclisin deputatı Azay Quliyev söyləyib.

O deyib: “Sevindirici haldır ki, son aylar, xüsusilə Suriyada Əsəd rejiminin devrilməsindən sonra Türkiyə qlobal güc olmaq və milli hədəflərinə çatmaq istiqamətində daha ciddi uğurlar əldə etməyə başlayıb. Bu kontekstdə, dünən, fevralın 27-də PKK terror təşkilatını yaradan və 1978-ci ildən ona rəhbərlik edən Abdullah Öcalanın terrorçuları silahları yerə qoymağa çağırması və bununla əlaqədar bütün məsuliyyəti öz üzərinə götürməsi ilə bağlı etdiyi müraciət çox əhəmiyyətli tarixi hadisədir. Bu müraciət terror təşkilatlarının fəaliyyətlərinin davam etməsinin “motivlərinin” və xarici ölkələrin onları dəstəkləmək üçün uydurduqları bütün bəhanələrin üstündən xətt çəkmiş oldu.

BMT Baş katibi Antonio Quterreşin, İraq Kürdüstan Regionunun Başçısı Neçirvan Bərzaninin, hətta PKK terror təşkilatının Suriya qolu kimi tanınan PYD və YPG qruplaşmasının silahların yerə qoyulması və terrorun dayandırılması ilə bağlı edilən təşəbbüsü dəstəkləməsi Türkiyənin terror bəlasından birdəfəlik qurtulması üçün tarixi imkan deməkdir. Türkiyənin bu prosesdən güclü və qalib çıxacağı artıq şübhə doğurmur. Türkiyənin qələbəsi isə həm də Azərbaycanın gücü və qalibiyyəti olacaq”.

Chosen
75
4
azertag.az

5Sources