Ermənistanın Türkiyə ilə sərhəddə yerləşən “Marqara” keçid məntəqəsinin inşasını başa çatdırması bir sıra məsələləri gündəmə gətirib. İki ölkə arasında gözlənilən qərarın yaxın zamanlarda verilməsinin mümkün olduğu bildirilir. Ekspertlər isə iddia edir ki, proseslər fonunda Türkiyə-Ermənistan sərhədi ilə paralel Zəngəzur dəhlizi də açıla bilər.
Globalinfo.az-a danışan politoloq Fərid Şəfiyev deyib ki, “Marqara” keçid məntəqəsi ilə bağlı inkişaf sərhədlərin tezliklə açılacağına işarə deyil:
Fərid Şəfiyev
“Türkiyə sərhədlə bağlı yekun qərar üçün ilk növbədə Ermənistanın Zəngəzur dəhlizini açmasını istəyir. Prinsipcə Azərbaycan da bütün işləri yekunlaşdırıb. Yəni hər şey İrəvanın mövqeyindən asılıdır. Ankara isə Bakının yanaşmasını daha vacib hesab edir. Ermənistan dəhlizlə bağlı müsbət qərar verməsə, sərhəd də açılmayacaq”.
