Filosof deyir ki, həyat mürəkkəb zülali maddələrin sadə hərəkət formasıdır. Bütün bəzəkli ifadələri kənara qoysaq, həyat Təbiət tərəfindən canlılara nəsil vermək üçün verilən bir imkandır, zamandır. Amma bunun üçün həyatı yaşamaq və uğrunda mübarizə aparmaq lazımdır. Təbiətdə azadlıq, rəqabət mütləqdir, mübarizə azad seçimdir, bir qayda olaraq, daha güclülər, daha cəsarətlilər, daha ağıllılar qalib gəlir. Deməli, daha sağlam, daha güclü nəsil yetişir. Odur ki, təbiətin bu günü dünənindən, sabahı bu günündən daha parlaq, daha işıqlıdır...
İnsan canlıların alisi olaraq, getdikcə təbiətdən, deməli həm də azadlıqdan daha çox uzaqlaşır. İnsan cəmiyyəti təbiətin qanunları ilə yox, öz qanunları ilə yaşayır, faktiki olaraq, azadlığı buxovlayır, rəqabətin əl-qolunu bağlayır. Cəmiyyətdə güclü olmaq üçün hətta ağıl, cəsarət yox, əlaqələr, var-dövlət gərəkdir. Burda sağlamlıq, qəhrəmanlıq ikinci dərəcəlidir, çünki həyat – nəsil vermək uğrunda mübarizə azad seçim deyildir. Kimin əlaqələri böyüksə, var-dövləti çoxsa, o da qalib gəlir. Deməli, sağlam, güclü yox, xəstə nəsil yetişir və bu xəstəlik getdikcə dərinləşir. Odur ki, təbiətdən fərqli olaraq, cəmiyyətin gələcəyi qaranlıqdır və bu qaranlıq getdikcə qatılaşır...
Qalib ARİF
Demokratikmusavat.com
