Polşanın baş naziri Donald Tusk bildirib ki, Aİ liderləri Londonda Ukrayna sammitində digər məsələlərlə yanaşı, ABŞ prezidenti Donald Tramp və Ukrayna prezidenti Vladimir Zelenski arasındakı mübahisəni də müzakirə ediblər.
Tuskun sözlərinə görə, görüş iştirakçıları birliyin zəruriliyindən danışıblar. “Hazırda hamımız elə hiss edirik ki, heç kimin fəaliyyət planı yoxdur və bu xaos hissi, improvizə yanaşma… bəzən bir neçə gün əvvəl Vaşinqtonda o çirkin tamaşada gördüyümüz emosiyalara bənzər emosiyalar oyadır ki, hamımız bundan qaçmağa üstünlük verirdik” – Donald Tusk deyib.
Polşa baş nazirinin sözlərinə görə, müttəfiq ölkələr gələcək danışıqları formalaşdırmaq üçün “sakit şəkildə sistemli, ümumi” mövqe təklif etməlidirlər. O, həmçinin Avropa ölkələrinin birliyinin Donald Trampı heyran edəcəyinə ümid etdiyini bildirib. O, əlavə edib ki, hazırda Avropa ölkələrinin Rusiyanın dondurulmuş aktivləri ilə bağlı vahid mövqeyi yoxdur. Bəzi Aİ liderləri avro və bank sistemi üçün potensial nəticələrdən qorxaraq onları geri götürmək istəmirlər.
//Samir Qurbanov, Editor.az
