Əhalinin qocalması ilə bağlı narahatlıqların olduğu Vyetnam doğum nisbətindəki kəskin azalmanın aradan qaldırılması üçün iki uşaq siyasətini yumşaldır.
Hafta.az-ın yazdığına görə, Səhiyyə Nazirliyinin ölkədə doğum nisbətinin Cənub-Şərqi Asiyada ən aşağı səviyyələrdən birinə enməsindən sonra cütlüklərə uşaqlarının sayı və vaxtı ilə bağlı qərara gəlməyə icazə verməyi nəzərdən keçirdiyi bildirilir.
Hökumətin məlumatlarına görə, Vyetnamda doğum nisbəti 2024-cü ildə rekord həddə aşağı düşüb və ümumi doğuş nisbəti bir qadına cəmi 1,91 uşaq oolub. Mütəxəssislər, əhalinin qocalması nəticəsində yarana biləcək işçi qüvvəsi çatışmazlığının və sosial-iqtisadi çətinliklərin qarşısını almaq üçün doğum səviyyəsinin əhalinin sabit saxlanılması üçün lazım olan səviyyədən aşağı olduğunu iddia edirlər.
Ölkə doğum nisbətindəki bərabərsizliklərlə də mübarizə aparır. Bəzi bölgələr digərlərindən daha az rəqəmlər bildirirlər. Məsələn, Ho Şi Min bölgəsində Vyetnamda ən aşağı göstəricisi - bir qadına 1,39 uşaq düşdüyü halda, şimaldakı Ha Qianq əyalətində ən yüksək göstərici – bir qadına 2,69 uşaq qeydə alınıb.
Səhiyyə nazirinin müavini Nguyen Ti Lien Huonq, əhalinin azalmasının qarşısını almaq üçün hökumətin təcili tədbirlər görməli olduğunu vurğulayıb. “Vietnamnet Global”a görə, "Biz ikidən çox uşaq sahibi olmaq üçün cəzaları azaltmaqla və maliyyə dəstəyi verməklə daha böyük ailələri təşviq etməliyik" deyib.
Vyetnamda doğum nisbəti 1999-cu ildən 2022-ci ilə qədər təxminən 2,1 səviyyəsində sabit qalıb, lakin 2023-cü və 2024-cü illərdə aşağı düşüb. Məlumatlara görə, doğum nisbətinin azalmağa davam edəcəyi və qızıl əhali dövrünün 2039-cu ilə qədər başa çatacağı proqnozlaşdırılır.
İki uşaq siyasəti ilk dəfə 1960-cı illərdə yoxsul və kənd əhalisi arasında körpə bumunu idarə etmək üçün həyata keçirilib. Qayda 2008-ci ildə bərpa edilməzdən əvvəl 2003-cü ildə ləğv edilmişdi.
Vyetnam yaşayış xərclərinin artması, iqtisadi qeyri-müəyyənlik və həyat keyfiyyətini prioritetləşdirmək üçün mədəni dəyişikliyə görə doğum nisbətinin davamlı olaraq azaldığını bildirən bir çox Asiya ölkələri arasındadır.
