Bakı, 5 mart, AZƏRTAC
Martın 5-də dünya ictimaiyyəti Beynəlxalq Tərksilah və Nüvə Silahlarının Yayılmaması üzrə Maarifləndirmə Gününü qeyd edir.
AZƏRTAC xəbər verir ki, BMT-nin rəsmi saytında bu əlamətdar gün münasibətilə dərc olunan müraciətdə deyilir: “Beynəlxalq Tərksilah və Nüvə Silahlarının Yayılmaması üzrə Maarifləndirmə Günü ictimaiyyət, xüsusilə gənclər arasında tərksilah məsələləri ilə bağlı daha yaxşı məlumatlılığı və anlayışı təşviq etməyə çalışır.
Birləşmiş Millətlər Təşkilatının yaradılmasından bəri çoxtərəfli tərksilah və silahların məhdudlaşdırılması məqsədləri təşkilatın beynəlxalq sülhü və təhlükəsizliyi qorumaq səylərində mərkəzi yer tutur”.
BMT qeyd edir ki, kütləvi qırğın silahları, xüsusən də nüvə silahları, dağıdıcı gücünə və bəşəriyyət üçün yaratdığı təhlükəyə görə daha çox narahatlıq doğurur. Adi silahların həddindən artıq istehsalı, atıcı və yüngül silahların qeyri-qanuni ticarəti beynəlxalq sülh və təhlükəsizliyə, davamlı inkişafa təhlükə yaradır, eyni zamanda, əhalinin məskunlaşdığı ərazilərdə partlayıcı silahlardan istifadə mülki əhali üçün ciddi təhlükə mənbəyidir. Avtonom silahlar kimi yeni və inkişaf etməkdə olan silah texnologiyaları qlobal təhlükəsizliyə problem yaradır və son illərdə beynəlxalq ictimaiyyətin diqqətini daha çox cəlb edir.
“Bu əlamətdar gün dünya ictimaiyyətinin tərksilah səylərinin sülhün və təhlükəsizliyin gücləndirilməsinə, silahlı münaqişələrin qarşısının alınmasına və onlara son qoyulmasına, həmçinin silahların səbəb olduğu insan iztirablarının qarşısının alınmasına necə töhfə verdiyi barədə anlayışının dərinləşməsində mühüm rol oynayır.
Baş Assambleya A/RES/77/51 qətnaməsi ilə bütün üzv dövlətləri, Birləşmiş Millətlər Təşkilatı sistemindəki təşkilatları, vətəndaş cəmiyyətini, elmi dairələri, medianı və ayrı-ayrı şəxsləri Beynəlxalq Günü qeyd etməyə, o cümlədən ictimai maarifləndirmə tədbirlərinin bütün vasitələrindən faydalanmağa dəvət edir”, -deyə müraciətin sonunda qeyd edilir.
