Ağ Evin sözçüsü Karolin Leavitt Tramp administrasiyasının HƏMAS ilə birbaşa və gizli danışıqlar aparması ilə bağlı iddiaları təsdiqləyib.
Publika.az xəbər verir ki, Leavitt danışıqlar haqqında İsrailə məlumat verildiyini qeyd edib.
O, ABŞ-ın girovlarla bağlı xüsusi nümayəndəsi Adam Boehlerə işarə edib: "Bu danışıqları aparan xüsusi nümayəndənin hər kəslə danışmaq səlahiyyəti var. Amerika xalqının ən yaxşı mənafeyinə uyğun olanı etmək üçün dünyadakı insanlarla danışıqlar prezidentin inandığı bir şeydir".
O, HƏMAS ilə danışıqlarda ABŞ-ın marağının əsirlərin azad edilməsi, yoxsa Trampın Qəzza planı olduğu sualına səssiz qalmayıb: “Bunlar davam edən danışıqlar və müzakirələrdir, burada təfərrüata varmayacağam. Təhlükədə olan Amerika vətəndaşlarının həyatıdır”.
