Qırğızıstan və Tacikistan mübahisəli ərazilər barədə razılığa gəldilər

Japarovun sözlərinə görə, ölkələrin mübadilə etdikləri torpaq sahələri ya anklavlardır, ya da sərhəd boyu dama taxtası şəklində düzülüb.

Qırğızıstan prezidentinin əmin etdiyi kimi, Tacikistanla sərhəd məsələsi “həmişəlik həll olunur”.

“Nəhayət, sona çatdı, hər iki tərəfin maraqları nəzərə alınıb. Sərhədlə bağlı hələ çox danışılacaq. Amma hələ vaxtı deyil. Qoy hər şey bitsin, sonra deyəcəyik. Onda tarix bizi mühakimə edəcək. Əminəm ki, bu, bizə “əla” qiymət verəcək”.

Fevralın 21-də Bişkek və Düşənbə arasında sərhədin ümumi hissəsinin demarkasiyasına dair sənəd imzalanıb. Japarovun izah etdiyi kimi, indi onu hər iki dövlətin parlamentləri ratifikasiya etməli və prezidentlər tərəfindən imzalanmalıdır, bundan sonra xarici işlər nazirlikləri arasında müvafiq notalar mübadiləsi aparılacaq.

Qırğızıstanla Tacikistan arasında dövlət sərhədinin uzunluğu təqribən 980 km-dir. Onun demarkasiyası ilə bağlı danışıqlar 2002-ci ilin dekabrından davam edir. Bu həll olunmamış məsələ dəfələrlə hər iki respublikanın sakinləri və hərbçiləri arasında toqquşmalara, o cümlədən odlu silahdan istifadəyə səbəb olub. Ümumilikdə 2014-cü ildən bəri Qırğızıstan-Tacikistan sərhədində 10-dan çox ciddi toqquşma olub.

Qırğızıstan Çin, Qazaxıstan, Özbəkistan və Tacikistanla həmsərhəddir. Tacikistan Qırğızıstanın bütün sərhəd məsələlərini həll edə bilmədiyi sonuncu qonşu dövlət olaraq qalır.