Aİ Komissiyasının 800 milyard avroluq yeni müdafiə paketi, Almaniyanın 500 milyard avroluq infrastruktur fondu planı və Fransa və Böyük Britaniyanın müdafiə xərclərini artırmaq hədəfləri ilə Avropa bazarlarında müdafiə və aviasiya şirkətlərinin səhmlərində artım tendensiyası güclənir. İlin əvvəlindən Böyük Britaniyada fəaliyyət göstərən BAE Systems-in səhmləri 41 faiz, Rheinmetall-ın səhmləri təxminən 99 faiz, Thales Group-un səhmləri 79 faiz və Airbus-un səhmləri 8 faiz artıb.
Avropa ölkələrinin müdafiə büdcələrinin artırılmasına hazırlıqlar müdafiə sənayesi və aviasiya şirkətlərinin paylarının sürətlə artmasına səbəb olub.
ABŞ prezidentliyindəki dəyişiklik Avropanın təhlükəsizlik siyasətinə böyük təsir göstərib. Keçmiş prezident Co Baydenin dövründə Avropa İttifaqı (AB) ilə ABŞ arasında müdafiə və Ukraynaya dəstək mövzusunda çox sıx ittifaq mövcud olsa da, Donald Tramp prezidentliyə gələndə bu yaxın əlaqələr pozulub.
Sərt ritorikası ilə onsuz da Avropada mənfi rəy formalaşdıran Trampın Avropaya iqtisadi və hərbi baxımdan uzaq yanaşması münasibətlərdə çox çətin dövrün başlanğıcı oldu. Prezident Trampın Ukraynada davam edən müharibəyə son qoymaq üçün Rusiya prezidenti Vladimir Putinlə Aİ ölkələrini sülh danışıqlarına qatmaması da münasibətlərdəki uçurumu artırıb. Sülh üçün diplomatik danışıqların artdığı bir dönəmdə Avropa ölkələri masa arxasında oturmaq istəsələr də, bu tələb ABŞ tərəfindən yerinə yetirilmədi.
Trampın Ukrayna prezidenti Vladimir Zelenski ilə kamera qarşısında mübahisəsindən və ABŞ-ın Kiyevə hərbi yardımı dayandırmaq qərarından sonra vəziyyət daha da mürəkkəbləşib.
Yanvarın 20-də vəzifəyə gəldikdən sonra Trampın siyasətlərini sürətlə dəyişməsindən və Aİ və Ukrayna ilə münasibətlərin gərginləşməsindən sonra Avropa ölkələri müdafiə xərclərini əhəmiyyətli dərəcədə artırmaq barədə qərarlarını açıqlamaqda davam edirlər. Yeni qərarlar müdafiə və aviasiya şirkətlərinin səhmləri üçün bazarlarda ralli yaradır.
