Şəkər, süd məhsulları və bitki yağlarının bahalaşması səbəbilə fevral ayında qlobal ərzaq mallarının qiymətləri artıb.
Valyuta.Az "Reuters"ə istinadən xəbər verir ki, bu barədə Birləşmiş Millətlər Təşkilatının Ərzaq və Kənd Təsərrüfatı Təşkilatı ("FAO") məlumat yayıb.
"FAO"nun Ərzaq Qiymət İndeksi – beynəlxalq bazarda ticarət olunan ərzaq mallarının aylıq qiymət dəyişikliklərini izləyən göstərici – ötən ay orta hesabla 127,1 bənd təşkil edib ki, bu da yanvar ayı ilə müqayisədə 1,6%, 2024-cü ilin fevral ayı ilə müqayisədə isə 8,2% çoxdur.
Bu artım əsasən şəkər qiymətlərinin 6,6% yüksəlməsi ilə bağlı olub. Bahalaşmaya 2024/25 mövsümündə qlobal tədarüklərin azalacağına dair narahatlıqlar, xüsusilə də Braziliyadakı əlverişsiz hava şəraiti təsir edib.
Yanvar ayı ilə müqayisədə süd məhsullarının qiyməti 4% artıb. Bütün əsas süd məhsullarında bahalaşma müşahidə olunub. Buna səbəb əsas ixracatçı bölgələrdə istehsalı üstələyən güclü idxal tələbi olub.
Bitki yağlarının qiyməti ay ərzində 2%, illik müqayisədə isə 29,1% artıb. Xüsusilə palma, soya və günəbaxan yağlarının bahalaşması Cənub-Şərqi Asiyada tədarük məhdudiyyətləri və biodizel sektorundan gələn güclü tələblə əlaqələndirilib.
"FAO"nun taxıl qiymətləri indeksi yanvar ayına nisbətən 0,7% yüksəlib.
Buğda qiymətləri Rusiyada təchizatın azalması və Şərqi Avropa ilə Şimali Amerikada məhsul şəraiti ilə bağlı narahatlıqlar fonunda artıb. Qarğıdalının qiyməti isə Braziliyadakı tədarük azalması və ABŞ-dən güclü ixrac tələbi səbəbindən yüksəlməkdə davam edib. Əksinə, fevral ayında qlobal düyü qiymətləri 6,8% ucuzlaşıb.
Ət qiymətləri isə ay ərzində cüzi – 0,1% azalıb.
"FAO"nun hesabatına görə, 2025-ci ildə qlobal buğda istehsalında təxminən 1% artım gözlənilir və bunun 796 milyon ton təşkil edəcəyi ehtimal edilir.
Bu artım əsasən Avropa İttifaqında, xüsusilə Fransada və Almaniyada gözlənilən istehsal artımı ilə dəstəklənir. Bununla belə, "FAO" xəbərdarlıq edib ki, Şərqi Avropada quraqlıq və Qərbi Avropada həddindən artıq yağıntılar məhsuldarlığa təsir göstərə bilər. ABŞ-da isə buğda əkilən sahələrin genişlənəcəyi gözlənilsə də, quraqlıq səbəbindən məhsuldarlıq azalacaq.
Düyü istehsalının 2024/25 mövsümündə 543 milyon tonla rekord həddə çatacağı proqnozlaşdırılır. Buna Hindistanda müsbət məhsul perspektivləri və Kamboca ilə Myanmada əlverişli yetişdirmə şəraiti səbəb olub.
"FAO", həmçinin 2024-cü il üçün qlobal taxıl istehsalı proqnozunu 2,842 milyard tona yüksəldib ki, bu da 2023-cü ilin göstəricisindən cüzi çoxdur.
