Azərbaycanın daha bir qadın güləşçisi – Elnurə Məmmədova da Albaniyada keçirilən Avropa çempionatında qızıl medal qazanıb.
Arena.az xəbər verir ki, Albaniyanın paytaxtı Tiranada 23 yaşadək güləşçilər arasında təşkil olunmuş U-23 Avropa çempionatı davam edir.
Bu gün qadın güləşi üzrə son medalçılar müəyyənləşiblər.
Gültəkin Şirinova (57 kq) təsəlliverici görüşdə türkiyəli Əminə Çakmaka 7:5 hesabıyla qalib gəlsə də, bürünc medal uğrunda qarşılaşmada rumıniyalı Georgiana Lirkayla bacarmayıb – 2:9.
Elnurə Məmmədova (53 kq) finalda rusiyalı Yekaterina Karpuşkinayla qarşılaşıb. Rəqibinə 3:0 hesabıyla qalib gələn Elnurə Avropa çempionu olub.
Ruzanna Məmmədova (65 kq) isə bürünc medal görüşündə ukraynalı Oleksandra Rıbaka 2:8 hesabıyla məğlub olub.
Xatırladaq ki, daha əvvəl qadın güləşçilərin mübarizəsində Günay Qurbanova (59 kq) da Avropa çempionatında qızıl medala sahib çıxmışdı.
