Avstraliyada orta məktəbdə 20 ildən artıqdır nümayiş etdirilən qaya parçası onlarla dinozavr izlərini daşıyır. 2002-ci ildə Kvinslendin Kallid mədənində tapılan daş geoloq Ues Nikolsun Biloela Dövlət Liseyinə hədiyyəsi olub. Nikolsun arvadı həmin vaxt məktəbdə müəllim işləyirdi.
Hafta.az-ın yazdığına görə, lakin yerli əhali qayadakı izləri araşdırmaq üçün Kvinslend Universitetindən Dr. Men Entoni Romilio ilə əlaqə saxlayana qədər onun əhəmiyyəti dərk edilmədi.
Komanda yoldaşları ilə qayanı təhlil edən Dr. Romilio plitənin səthində təxminən 200 milyon il əvvəl Erkən Yura dövrünə aid 47 dinozavra aid toplam 66 fosilləşmiş ayaq izini müəyyən edib.
“Historical Biology” jurnalında dərc edilən məqaləyə görə, səth sahəsi demək olar ki, 1 kvadratmetr olan qaya Avstraliyada sənədləşdirilmiş daşlaşmış ayaq izlərinin ən sıx nümunələrindən biridir.
Alimlər qayanın üçölçülü silikon modelini yaradıb, ayaq izlərinin fotoşəkillərini çəkib və ətraflı şəkildə araşdırıblar.
Avstraliyada bu günə qədər Erkən Yura dövrünə aid dinozavr sümükləri tapılmadığından, hansı növlərin ayaq izlərini qoyub getdiyini dəqiq müəyyən etmək mümkün olmayıb. Bununla belə, tədqiqatçılar bitkilərlə qidalanan Anomoepus scambusun izlərin arxasında olduğunu düşünürlər. Bu kiçik ikiayaqlı dinozavrların əvvəlki tapıntıları onların uzun ayaqları, qısa qolları və dolğun bədənə malik olduğunu göstərir.
Dr. Romilio deyir: "Bu dinozavrlar kiçik idi, ayaqlarının uzunluğu 15-50 santimetr arasında dəyişirdi və bu izləri qyarkən saatda 6 kilometrdən daha yavaş gedirdilər".
Komanda ayaq izlərinin dinozavrların dayaz sulardan keçərkən bir neçə gün və ya həftə ərzində əmələ gəldiyini düşünür.
Avstraliyada heç bir Anomoepus scambus sümükləri aşkar edilməsə də, alimlər belə bir kəşfin ictimaiyyətin köməyi ilə edilə biləcəyini deyirlər.
