Yanvarın 23-24-də Kanakidə (Yeni Kaledoniya) keçirilmiş Beynəlxalq Dekolonizasiya Cəbhəsinin konqresi tarixi qərarlardan biri ilə yadda qaldı. Konqresdə Cəbhənin rəsmi simvolu kimi Dəmir Yumruq rəmzinin seçilməsi, təkcə bir hərəkət deyil, həm də qlobal ədalət mübarizəsində yeni mərhələnin başlanğıcıdır.
Bu qərar Azərbaycanın beynəlxalq arenada artan nüfuzunun və haqq işinin dünya miqyasında qəbul edildiyini göstərir. Dəmir Yumruq, 2020-ci ildə Azərbaycanın Qarabağda suverenliyini bərpa etməsinin və illərlə davam edən işğala son qoymasının simvolu olmuşdu. Lakin bu rəmz artıq təkcə Azərbaycanın deyil, bütün dünyada kolonializmə qarşı mübarizə aparan xalqların azadlıq nişanəsinə çevrilir.
Bakıdan Başlayan Dekolonizasiya Hərəkatı
Qeyd edək ki, Beynəlxalq Dekolonizasiya Cəbhəsi 2024-cü ilin iyulunda Bakıda Fransanın son koloniyalarının nümayəndələri tərəfindən yaradılmışdı. Bu təşəbbüs Azərbaycanın müstəmləkəçilik əleyhinə beynəlxalq mübarizədə aparıcı rol oynadığını sübut edir. Azərbaycan həmişə ədalətin və beynəlxalq hüququn müdafiəçisi kimi çıxış edib və işğalçılığa qarşı apardığı mübarizə ilə dünyada azadlıq uğrunda savaşan xalqlara ilham verib.
Bakı Təşəbbüs Qrupunun dəstəyi ilə yaradılan bu cəbhə, müstəmləkə zəncirindən qurtulmaq istəyən xalqların birgə platformasına çevrildi. Cəbhənin Kanakidə keçirilən son konqresində Azərbaycanın liderliyi və mübarizə prinsipləri əsas nümunə kimi qəbul edildi.
Dəmir Yumruq – Ədalətin Beynəlxalq Simvolu
Fransa hələ də dünyanın bir sıra bölgələrində müstəmləkə siyasətini davam etdirir. Yeni Kaledoniya, Fransız Polineziyası, Qvadelupa, Martinika və başqa ərazilər hələ də Parisin nəzarətindədir. Lakin həmin bölgələrin yerli xalqları müstəqillik və suverenlik uğrunda mübarizəni gücləndirirlər.
Dəmir Yumruq bu mübarizənin simvolu olaraq, qlobal ədalət və azadlıq hərəkatının yeni rəmzinə çevrilir. Azərbaycan, 30 il işğal altında qalmış torpaqlarını öz gücünə azad edərək, beynəlxalq hüququn və milli suverenliyin təmin olunmasının mümkünlüyünü sübut etdi. Bu təcrübə, Fransa müstəmləkəsində olan xalqlara da öz azadlıqlarını əldə etmələri üçün ümid verir.
Azərbaycanın Artan Beynəlxalq Nüfuzu
Bu qərarın qəbul edilməsi, Azərbaycanın beynəlxalq diplomatiyada fəal rol oynadığını göstərir. Prezident İlham Əliyevin liderliyi altında Azərbaycan təkcə regional deyil, qlobal məsələlərdə də söz sahibi olmağa başlayıb. Fransa müstəmləkəçiliyinə qarşı Bakıda başlanan mübarizə, indi Yeni Kaledoniyaya və digər koloniyalara qədər genişlənib.
Azərbaycanın ədalətli mövqeyi və güclü siyasi iradəsi, onu beynəlxalq arenada haqq və hüququn müdafiəçisi kimi tanıdıb. Dəmir Yumruğun Beynəlxalq Dekolonizasiya Cəbhəsi tərəfindən qəbul edilməsi, Azərbaycanın ədalət mübarizəsində nümunəvi ölkə olduğunu təsdiq edir.
Nəticə
Beynəlxalq Dekolonizasiya Cəbhəsinin Dəmir Yumruğu rəsmi simvol kimi qəbul etməsi, Azərbaycanın qlobal əhəmiyyətini və haqq uğrunda apardığı mübarizənin təsirini bir daha sübut edir. Bu, həm də dünyada müstəqillik uğrunda savaşan xalqlara bir mesajdır: Ədalət gec-tez zəfər çalacaq, vətən torpağı azad olunacaq!
Azərbaycanın işğaldan azad etdiyi torpaqlar necə ki, xalqımız üçün qürur mənbəyidirsə, indi də dünya üzrə azadlıq hərəkatları üçün yeni bir inam qaynağıdır. Dəmir Yumruq – yalnız bir ölkənin deyil, bütün haqsızlığa qarşı savaşanların rəmzidir!
Azər Yadigaroğlu
