Almaniyada aparılan araşdırmaya görə, süni intellektdən istifadə şirkətlər arasında sürətlə yayılır.
Bu gün təxminən hər beş şirkətdən biri süni intellektdən istifadə edir.
"Cebheinfo.az" xəbər verir ki, Federal Statistika İdarəsinin sorğusuna əsasən, süni intellekt texnologiyaları Almaniya iqtisadiyyatında getdikcə əhəmiyyət kəsb edir. Statistika İdarəsinin verdiyi açıqlamaya görə, bu gün ölkədə təxminən hər beş şirkətdən biri ( 20%) süni intellektdən istifadə edir. Bu rəqəm keçən ilki sorğuda 12 % olaraq qeyd edilmişdi. "Wiesbaden" mərkəzli agentliyin 2021-ci ildə mövzu ilə bağlı keçirdiyi ilk sorğuda şirkətlərin 11 faizi süni intellektdən istifadə etdiklərini bildirib.
Statistik araşdırmalar çərçivəsində, 84 min şirkətə süni intellekt texnologiyalarından istifadə edib-etmədikləri soruşulub. Təxminən 18000 şirkətdən cavablar alınıb.
Cavabların qiymətləndirilməsi nəticəsində məlum olub ki, iri şirkətlər süni intellekt texnologiyalarından daha intensiv istifadəyə meyillidirlər. Məlumatlara görə, süni intellekt texnologiyaları ən çox yazılı dilin (mətn) təhlili (48 faiz) və nitqin tanınması (47 faiz) üçün istifadə olunur. Bu tətbiqlər xüsusilə marketinq və satış sahələrində istifadə olunur (33 faiz).
Şirkətlər həmçinin istehsal və xidmət prosesləri üçün süni intellektdən istifadə etdiklərini (25 faiz), onların idarə edilməsini sadələşdirdiklərini (24 faiz) və mühasibatlığın (24 faiz) olduğunu bildirdilər. Süni intellektdən istifadə etməkdən çəkinən şirkətlər səbəb kimi məlumat çatışmazlığını (71 faiz), hüquqi nəticələrlə bağlı qeyri-müəyyənliyi (58 faiz) və məlumatların qorunması ilə bağlı narahatlıqları (53 faiz) göstəriblər. Süni intellektdən istifadə etməyən təxminən hər beş şirkətdən biri ( 21 faiz ) öz bizneslərində süni intellektdən istifadəni məntiqli görmədiklərini bildiriblər.
