Kreml Qazaxıstan Nəqliyyat Nazirliyinin AZAL təyyarəsinin qəzasının araşdırılması ilə bağlı ilkin hesabatını şərh etmir. Bunu Rusiya prezidentinin mətbuat katibi Dmitri Peskov deyib.
“Bu, ilkin hesabatdır. Təbii ki, bizim aidiyyatı idarələrimiz bunu lazımi diqqətlə öyrənəcəklər. Rusiya Prezident Administrasiyasının bu mövzuda şərh verməsi mümkün deyil, biz bunu mümkün hesab etmirik”, - deyə Peskov bildirib.
Qeyd edək ki, Qazaxıstan Nəqliyyat Nazirliyi dekabrın 25-də Bakıdan Qroznıya uçan və Qroznı səmasında Rusiyanın hava hücumundan müdafiə sistemi tərəfindən vurulan Embraer 190 sərnişin təyyarəsi ilə bağlı ilkin hesabat yayıb.
Xatırladaq ki, təyyarədə 62 sərnişin və beş ekipaj üzvü olub. Qəza nəticəsində 38 nəfər həlak olub, 29 nəfər sağ qalıb.
