Aviadaşıyıcılar artıq mənəvi cəhətdən köhnəlmiş ola bilər və döyüş gəmiləri kimi tarixə qovuşa bilər...
Poliqon xəbər verir ki, bu barədə 19fortyfive analitik məqaləsində Kazimir Pulaşki Fondunun (Varşava) xarici hərbi məsələlər üzrə eksperti, Pentaqonun keçmiş məsləhətçisi Ruben F. Conson yazır.
Ekspert qeyd edir ki, gəmi əleyhinə ballistik raketlər artıq bir müddətdir böyük hərbi gəmilər, xüsusən də ABŞ Hərbi Dəniz Qüvvələrinin əsas sütunu sayılan aviadaşıyıcılar üçün real təhlükə kimi nəzərdən keçirilir. Çin də bu sahəyə böyük sərmayə yatıraraq Xalq Azadlıq Ordusunu inkişaf etdirir.
Lakin aviadaşıyıcını batırmaq əslində heç də asan vəzifə deyil. Hələ sovet dövründəki hərbi-dəniz planlaşdırıcıları hesablamışdılar ki, ABŞ-a məxsus böyük bir hərbi gəmini sıradan çıxarmaq üçün azı 12 qanadlı və ya digər tipli raketin birbaşa dəyməsi tələb olunur. Bu, hədəfə çatmayan və ya vurularaq məhv edilən raketləri nəzərə almadan aparılan hesablamadır.
2019-cu ildə rusiyalı hərbi ekspertlər isə bildirirdilər ki, hətta 12 raket zərbəsi belə kifayət etməyə bilər. Onların hesablamalarına görə, 1-3 raketin birbaşa dəyməsi yalnız səthi zədələrə səbəb olacaq və bu zərərlər asanlıqla təmir edilə bilər. Ciddi ziyan vurmaq üçün 6-8 raket, tam məhv üçün isə ən azı 20 raket lazımdır.
Bu hesablamalar aviadaşıyıcıların heyətinin yüksək peşəkarlığını da nəzərə alır. Belə ki, minlərlə hərbçidən ibarət olan heyət təsadüfi insanlar deyil, əksinə, daim yanğınların və partlayışların qarşısını almaq üçün təlim keçən mütəxəssislərdən ibarətdir.
Bundan əlavə, hər bir iri hərbi gəmi partlayışlara və yanğınlara tab gətirmək üçün xüsusi konstruksiyaya malikdir. Göyərtədə hər zaman kifayət qədər təcili təmir avadanlıqları olur və bütün əsas sistemlər ehtiyat variantlarla təmin edilir.
"Aviadaşıyıcı böyük dözümlülüyə malikdir, lakin əlbəttə ki, toxunulmaz deyil. Ona ciddi zərər vurmaq üçün böyük güc tətbiq olunmalıdır, çünki onu sıradan çıxarmaq yalnız çoxsaylı zərbələrlə mümkündür. Üstəlik, aviadaşıyıcı asanlıqla təslim olmayacaq", deyə bir rusiyalı analitik məqaləsində qeyd edib.
Poliqon.info
