Cənubi Koreyanın aparıcı internet portal operatoru "Naver Corp." bu gün bildirib ki, IV rübdə xalis mənfəəti bir il öncəyə nisbətən təxminən 50 % artıb. Bu artım, əsasən, axtarış və e-ticarət biznesindən əldə edilən güclü satışlarla əlaqələndirilir.
Dekabr ayında başa çatan üç ay ərzində şirkətin xalis mənfəəti 444,1 milyard von (306,6 milyon ABŞ dolları) təşkil edib ki, bu da bir əvvəlki ilin eyni dövründə qeydə alınan 298,4 milyard von (206 milyon ABŞ dolları) məbləğindən 48,8 % çoxdur.
Valyuta.Az Koreyanın "Yonhap" agentliyinə istinadən xəbər verir ki, bu barədə "Naver" tənzimləyici orqanlara təqdim etdiyi hesabatda məlumat verib.
Bu dövrdə şirkətin əməliyyat mənfəəti illik müqayisədə 33,7 % artaraq 542 milyard von (374 milyon ABŞ dolları) olub. Satış gəliri isə 13,7 % artımla 2,88 trilyon von (1,99 milyard ABŞ dolları) təşkil edib.
Şirkətin gəlirləri bazar gözləntilərini üstələyib. "Yonhap Infomax"ın analitiklər arasında apardığı sorğuya əsasən, xalis mənfəətin orta hesabla 415,6 milyard von (286 milyon ABŞ dolları) olacağı proqnozlaşdırılırdı.
"Naver" bu güclü göstəriciləri əsas biznes sahələrində satışların artması ilə izah edib.
Şirkətin əsas axtarış platforması bölməsinin gəliri, platformanın rəqabət qabiliyyətini artırmaq üçün görülən tədbirlər nəticəsində, illik 14,7 % artaraq 1,06 trilyon von (733 milyon ABŞ dolları) olub.
E-ticarət bölməsinin satışları 17,4 % artaraq 775,1 milyard von (537 milyon ABŞ dolları), maliyyə texnologiyaları bölməsinin gəliri isə 12,6 % artımla 400,9 milyard von (277 milyon ABŞ dolları) təşkil edib.
Məzmun bölməsi cüzi artımla 467,3 milyard von (323 milyon ABŞ dolları) gəlir əldə edib (0,2 % artım), bulud texnologiyaları biznesi isə 41,1 % artımla 177,6 milyard von (123 milyon ABŞ dolları) gəlir gətirib.
2024-cü ilin yekunlarına görə, "Naver"in xalis mənfəəti illik 89 % artaraq 1,86 trilyon von (1,29 milyard ABŞ dolları), əməliyyat mənfəəti isə 32,9 % artaraq 1,97 trilyon von (1,36 milyard ABŞ dolları) olub.
İllik satış gəliri 11 % artaraq 10,73 trilyon von (7,32 milyard ABŞ dolları) yüksəlib. Bu, Cənubi Koreyada bir platforma şirkətinin ilk dəfə illik 10 trilyon vondan çox gəlir əldə etməsi ilə tarixə düşüb.
"Naver"in baş icraçı direktoru Çoi Su-yon açıqlamasında bildirib: "Bu il bizim üçün süni intellekt (AI) strategiyamızı tam tətbiq edəcəyimiz mühüm bir dövrdür. Biz AI texnologiyasına əsaslanan platformalarımızı inkişaf etdirməyə davam edərək yeni dəyər və biznes imkanları yaradacağıq və nəticədə rəqabət üstünlüyümüzü daha da gücləndirəcəyik."
Bundan əlavə, "Naver" 26 mart tarixində ümumi səhmdarlar yığıncağı keçirməyi və şirkətin qurucusu Li He-cinin Direktorlar Şurasının sədri vəzifəsinə təyin olunması təklifini müzakirə etməyi planlaşdırır.
Təyinat təsdiqləndiyi halda, Li 2017-ci ildə vəzifəsindən ayrıldıqdan yeddi il sonra yenidən rəhbər vəzifəyə qayıdacaq. O, "Naver"in AI texnologiyalarının inkişafına rəhbərlik edəcək. Şirkət 2023-cü ildə təqdim etdiyi generativ süni intellekt modeli "HyperClova X" əsasında yeni AI xidmətləri təqdim etməyi planlaşdırır.
Onun geri dönüşü "Naver"in süni intellekt sahəsindəki mövqeyini möhkəmləndirmək niyyətini vurğulayır. Bu addım, xüsusilə, son zamanlarda Çinin "DeepSeek" şirkətinin AI modellərinin bazara daxil olması ilə daha da gərginləşən rəqabət fonunda mühüm əhəmiyyət kəsb edir.
Rəhim
