“Coca-Cola” şirkəti bu il Azərbaycanda 30 illik yubileyini qeyd etməyə hazırlaşır.
Bu barədə “Azerbaijan Coca-Cola Bottlers” MMC-nin baş direktoru Rəna Məmmədova bildirib. O deyib ki, “Coca-Cola” bu il 30 illiyini qeyd edəcək.
Rəna Məmmədova diqqətə çatdırıb ki, İsmayıllıda yeni zavodun tikilməsi “Coca-Cola”nın Azərbaycana olan uzunmüddətli investisiya öhdəliyini nümayiş etdirir. Şirkətin İsmayıllıda yeni zavod açması həm bölgənin sosial-iqtisadi inkişafına, həm də digər təsərrüfat sahələri ilə əlaqəli dəyər zəncirinə müsbət təsir göstərəcək:
“Bu zavod yalnız yeni iş yerləri yaratmaqla kifayətlənmir, həm də yerli istehsalın artırılmasına imkan verəcək. Yeni fəaliyyətə başlayacaq müəssisəyə sərmayə qoymaq qərarımız ölkədə güclü iqtisadiyyata və əlverişli investisiya mühitinə olan möhkəm inamımızı bir daha təsdiq edir. Bu onun göstəricisidir ki, ölkədə yerli və xarici sərmayəçilər üçün dayanıqlı iqtisadi mühit mövcuddur”,- deyə o əlavə edib.
Baş direktor onu da vurğulayıb ki, Beynəlxalq keyfiyyət və təhlükəsizlik standartlarına cavab verən yeni istehsal müəssisəsi 15 hektar sahədə qurulur, investisiya dəyəri isə 68 milyon manatdır.
“Burada 100-dən artıq sakinin işlə təmin edilməsi planlaşdırılır. İllik istehsal gücü 165 milyon litr olacaq müəssisədə şirkətin “Coca-Cola”, “Fanta”, “Sprite” kimi brendləri istehsal olunacaq. Yeni zavod, əsasən, daxili bazar ehtiyaclarını təmin etmək üçün nəzərdə tutulub. Əminəm ki, yeni müəssisənin fəaliyyətə başlaması yerli təchizatçılara daha çox biznes imkanı verəcək, dövlət büdcəsinin vergi gəlirlərini artıracaq və yerli infrastrukturun güclənməsinə təkan verəcəkdir”,- deyə R. Məmmədova bildirib.
Qeyd edək ki, şirkətin inkişaf planı çərçivəsində bu il “Coca-Cola”nın Azərbaycanda 2-ci istehsal müəssisəsinin açılması planlaşdırılır.
